Gjatë vizitës në spitalin Infektiv, kryeministri Rama ka folur edhe për hapjen e shkollave dhe përballjen e nxënësve me rregullat ndaj pandemisë.
Pas pak ditësh do të hapen shkollat me masat e reja anti-COVID. Gjatë takimit me mjekët dhe infermierët që po luftojnë në vijën e parë të betejës me COVID-19 tek infektivi, Rama ka folur edhe si prind, që këtë vit do të çojë në klasën e parë djalin e vogël, Zahon.
“Kemi tani sfidën e madhe të hapjes së shkollave. Fëmijët janë më pak të rrezikuar, por jo të imunizuar, plus që janë transmetues.
Ne kemi çunin që do të shkojë në klasën e parë, një fëmijë i vogël me maskë. Mos tako, mos u përqafo, rri larg, bëj kujdes! Vendoset në një situatë që është komplet e panjohur edhe për pasojat që lë në aspektin e zakoneve që krijon.
Pasi të gjithë si prindër u themi fëmijëve, ‘përshëndete, takoje, përqafoje’, por duhet t’u themi të kundërtën. Por nuk e kemi zgjedhur, na ka zgjedhur kjo sfidë”.
