Kryeministri i Maqedonisë së Veriut, Zoran Zaev ka dhënë një intervistë për “Deutsche Welle”, ku edhe ka folur për arratisjen e paraardhësit të tij, Nikolla Gruevski.
Zaev u shpreh se qeveria hungareze e ndihmoi ish-kryeministrin Gruevski që të arratisej nga vendi dhe i dha atij leje qëndrimi në Hungari.
“Shkeli ligjin ndërkombëtar. Tani po kërkojmë një mënyrë ligjore për ta kthyer atë që të vuajë dënimin me burg. Sidoqoftë, shumë ish-ministra të tjerë janë në paraburgim ose tashmë vuajnë dënime me burg, madje edhe nga qeveria aktuale. Njerëzit e afërt me këtë qeveri po ndiqen penalisht në gjykatë, ose janë tashmë në burg,” tha Zaev.
Nikolla Gruevski akuzohet në vendin e tij për shpërdorim detyre, konkretisht për blerje votash dhe përblerjen e një makine tip “Armored Mercedes” me vlerë 600 mijë euro. Ai u arratis nga Maqedonia më nëntor 2018, dhe e kaloi kufirin me një pasaportë të rreme, duke kaluar edhe nga kufiri shqiptar.
