Qytetarë të shumtë dolën në rrugët e Tiranës, në një manifestim për Ukrainën. Pjesë e tij janë bërë edhe Ambasadori i Ukrainës në vendin tonë, Volodymyr Shkurov, së bashku me kryebashkiakun Erion Veliaj dhe ambasadoren amerikane Yuri Kim.
Me flamuj të Ukrainës në duar, ata kanë marshuar drejt Ambasadës Ruse në vendin tonë. Kjo e premte shënon ditën e 44 të luftës në Ukrainë. Marshimi nisi nga sheshi Skënderbej, ku të pranishmit po marshojnë të kapur krah për krah me njëri-tjetrin.
Ambasadorja amerikane në Tiranë, Yuri Kim, ka shprehur solidaritetin e saj për luftën në Ukrainë, teksa mori pjesë në manifestimin e organizuar në Tiranë. “Siç tha Presidenti Biden, Putini i ka bërë keq llogaritë. Ai mendoi se mund të futej në Ukrainë, dhe bota do t’i hapte rrugën. Por u ndesh me një mur të fortë, që nuk e kishte parashikuar, popullin e Ukrainës.
Është nder për mua të qëndroj këtu me kolegun tim, ambasadorin Shkurov dhe t’i shpreh mbështetjen se ne qëndrojmë me Ukrainën kundër këtij agresioni. Besoj se çdo shqiptarë bie dakord me këtë.
Nuk e them vetëm sepse ju jeni aleatë të SHBA dhe NATO, nuk e them vetëm sepse jeni pjesë e Europës dhe prisni të bëheni pjesë e BE, e them sepse askush më shumë se shqiptarët e dinë si ndihet të kesh dikë që kërkon të mohojë ekzistencën tuaj, t’ju thotë se ju nuk keni të drejtë të ekzistoni.
Askush nuk e di më mirë tmerrin e të arratisurit prej bombave, agoninë e të varrosurit të të afërmve të vdekurve apo dhe më keq, pamundësi për t’i dhënë një varr atyre që kanë vdekur. Askush nuk e njeh më mirë vlerën e ngushëllimit kur dikush shtrin dorën. Bashkohem me ju për të shprehur solidaritetin me miqtë e Ukrainës, dhe për të thënë ‘rroftë Ukraina'”, tha ambasadorja.
