Dje, menjëherë pas vendimit të Bashës për t’u dorëhequr, Uashingtoni la të nënkuptohej se nuk ndryshon qëndrimi i tij që selia blu të drejtohet në të ardhmen nga një politikan jo i shpallur “non grata”. Në këtë formë, shenjestra drejtohet ndaj ish-kryeministrit Berisha. Shtetet e Bashkuara të Amerikës përshëndetën vendimin e Lulzim Bashës për t’u dorëhequr nga kryetari i Partisë Demokratike.
Në deklaratën e publikuar në faqen zyrtare, Ambasada e SHBA-së në Shqipëri u shpreh se shpreson që PD-ja të vazhdojë të forcojë marrëdhëniet me shtetin amerikan për të kontribuar në realizimin e reformave madhore në Shqipëri, në kuadër të aspiratës së integrimit në BE.
Po të lexohet mes rreshtave, deklarata e Ambasadës Amerikane, duket qartë që Sali Berishës i është mbyllur dera, dhe se ata nuk e duan atë në krye të Partisë Demorkatike. Megjithatë lidhur me të ardhmen e PD-së, Ambasada e SHBA shtoi se partia më e madhe opozitare duhet të drejtohet mbi parimet dhe idealet e demokracisë, në mënyrë që nesër të vijë në pushtet.
“Vendimi i marrë nga Lulzim Basha sot për t’u dorëhequr si Kryetar i Partisë Demokratike meriton respekt. Vënia e interesave të partisë dhe të vendit mbi ato personale është shenjë e udhëheqësisë së vërtetë. Shpresojmë që vendimi do të përcaktojë rrugën që Partia Demokratike të ecë përpara drejt së ardhmes; do të forcojë marrëdhënien e veçantë të Shqipërisë me Shtetet e Bashkuara; do të përforcojë mbështetjen për reformat dhe përpjekjet e tjera për qëllimin e Shqipërisë për t’iu bashkuar Bashkimit Europian; dhe do të ritheksojë parimet dhe idealet demokratike mbi të cilat u themelua. Një opozitë e fortë që mund të jetë e gatshme për të udhëhequr është thelbësore për demokracinë. Mbështetja e Shteteve të Bashkuara për demokracinë dhe përkushtimi për të luftuar korrupsionin dhe pandëshkueshmërinë mbeten të pandryshuara”, thuhet në deklaratën e publikuar nga Ambasada Amerikane.
