Ambasadorja e SHBA në Tiranë, Yuri Kim, ka zhvilluar një takim me Ministrin e Drejtësisë, Ulsi Manja, me të cilin kanë diskutuar për Reformën në Drejtësi. Lajmin në fjalë e ka përcjellë vetë ambasadorja përmes një postimi në faqen zyrtare në Twitter. Yuri Kim ka shkruar se nëpërmjet këtij takimi është diskutuar përsa i përket progresit dhe hapave që duhen marrë për zbatimin e Reformës në Drejtësi.
“Takim shumë produktiv me Ministrin e Drejtësisë Ulsi Manja, për diskutimin në lidhje me progresin dhe hapat e ardhshëm në zbatimin e Reformës në Drejtësi. Shtetet e Bashkuara mbështesin këtë vit fokusin në: Eliminimin e mangësive dhe joefikasiteteve veçanërisht për të reduktuar numrin e rasteve të grumbulluara në gjykatat administrative; duke iu përgjigjur shqetësimeve të qytetarëve për pretendimet dhe të drejtat pronësore në kohë, transparente dhe kuptimplotë, gjë që është gjithashtu e rëndësishme për të tërhequr investime të huaja dhe për të përmbushur standardet e BE-së, si dhe përballje me pasojat për zyrtarët që përfshihen në korrupsion. Njerëzit meritojnë rezultate reale nga Reforma në Drejtësi”, ka shkruar ambasadorja amerikane, Yuri Kim.
