Ka patur përplasje të zemëruara midis të dërguarve rusë dhe amerikanë në Këshillin e Sigurimit të OKB-së, pasi SHBA thirri një takim për të diskutuar mbi ngritjen e trupave të Moskës në kufijtë e saj me Ukrainën. Ambasadorja e SHBA, Linda Thomas-Greenfield tha se mobilizimi ishte më i madhi që Evropa kishte parë në dekada.
Homologu i saj rus akuzoi SHBA-në për nxitje të histerisë dhe ndërhyrje të papranueshme në punët e Rusisë. SHBA dhe Britania e Madhe kanë premtuar sanksione të mëtejshme, nëse Rusia pushton Ukrainën.
Sekretarja e Jashtme e Mbretërisë së Bashkuar, Liz Truss, tha se legjislacioni që po përgatitej, do të synonte një gamë më të gjerë individësh dhe biznesesh pranë Kremlinit se sa është e mundur aktualisht.
Një zyrtar amerikan tha se sanksionet e Uashingtonit nënkuptonin se individët pranë Kremlinit do të shkëputeshin nga sistemi financiar ndërkombëtar. Rusia ka vendosur rreth 100.000 trupa, tanke, artileri dhe raketa pranë kufijve të Ukrainës.
Përpjekjet diplomatike vazhdojnë, me Sekretarin e Shtetit të SHBA Antony Blinken, që do të zhvillojë bisedime me Ministrin e Jashtëm rus Sergei Lavrov sot. Shtetet e Bashkuara thanë se kishin marrë një përgjigje me shkrim nga Rusia, ndaj një propozimi të SHBA-së që synonte de-përshkallëzimin e krizës në Ukrainë. Por disa orë më vonë, zëvendësministri i Jashtëm i Rusisë tha se kjo nuk ishte e vërtetë, dhe një burim i tha agjencisë së lajmeve Ria se ishte ende duke përgatitur një përgjigje.
Një zëdhënës i Departamentit të Shtetit tha se SHBA mbetet plotësisht e përkushtuar ndaj dialogut, dhe do të vazhdojë të konsultohet ngushtë me aleatët dhe partnerët e saj, përfshirë Ukrainën.
Ndërkohë, një numër liderësh evropianë po udhëtojnë në Ukrainë të martën për bisedime. Kryeministri i Mbretërisë së Bashkuar, Boris Johnson, po fluturon për në Kiev, pasi premtoi se do të punojë me presidentin ukrainas Volodymyr Zelensky për të gjetur një zgjidhje diplomatike, për argumentet me Moskën dhe “të shmangë gjakderdhjen e mëtejshme”. Kryeministri polak Mateusz Moraëiecki dhe kryeministri holandez Mark Rutte, po shkojnë gjithashtu në kryeqytetin ukrainas.
Burimi i lajmit: BBC. Përshtatur nga Tirana Today