Presidenti i medias “Ora News”, Ylli Ndroqi, dhe bashkëshortja e tij Mimoza janë infektuar nga koronavirusi. Ndroqi bën me dije se ai dhe bashkëshortja e tij i janë nënshtruar një regjimi e terapie të fortë, nën kujdesin e mjekëve dhe infermierëve. Ai e cilëson virusin si të pabesë, ndërsa u drejtohet miqve, familjarëve dhe jo vetëm që të ruajnë veten në këtë situatë të vështirë.
“Të dashur miq, për shkak të pamundësisë për t’ju përgjigjur në angazhimet ditore dhe mesazheve të shumta si pasojë e mungesës sime, dua t’ju bëj me dije se prej disa ditësh, unë dhe bashkëshortja ime jemi në trajtim intensiv të prekur të dy nga Covid-19.
Nuk është e lehtë kjo betejë, siç e dini familja ime është goditur rëndë, ndaj i jemi nënshtruar një regjimi e terapie të fortë nën kujdesin skrupuloz të mjekëve dhe infermierëve, që gjej rastin t’i falënderoj për gjithçka bëjnë në këto kohë të mbrapshta për mbarë botën.
Duke ju kërkuar ndjesë për pamundësinë e përgjigjes ndaj secilit, duke ju qënë mirënjohës për mesazhet mbështetëse, duke ju kujtuar të ruani veten e të shtrenjtët tuaj se është kaq i pabesë ky virus, uroj ta kalojmë me kurajo e përkushtim këtë moment të paprecedentë në jetën tonë. Shihemi së shpejti, me respekt Ylli e Mimoza Ndroqi”, shkruan ai.
