Për Xho Bajden ishte një dashuri me shikim të parë. Studenti i Universitetit të Delauerit, po kalonte pushimet verore në Bahamas. Ai hyri në një resort të famshëm, ku i ra menjëherë në sy studentja e Universitetit të Sirakuzës, Neilia Hunter, që po merrte rreze dielli pranë një pishine.
“Kur u kthye nga unë, pashë se ajo kishte një buzëqeshje të bukur dhe sy të gjelbër të mrekullueshëm”- shkroi ai në kujtimet e tij “Premtimet që duhen mbajtur”. Xho zbuloi se Neilia ishte e ngrohtë, dhe nuk i bëri përshtypje edukata e tij modeste e marrë në Skrenton të Pensilvanisë.
Ndërsa marrëdhënia e tyre po bëhej me e ngushtë, prindërit e saj kapërcyen çdo dyshim në lidhje me politikën e tij (ai është demokrat, ata ishin republikanë) dhe besimin fetar (ai është katolik, ata ishin presbiterianë).
Si e tillë, dasma e zhvilluar në gushtin e vitit 1966 midis Xho dhe Neilias, u duk se ishte vetëm një moment historik i hershëm në romancën e tyre. Askush nuk e dinte se bashkimi i tyre do të përfundonte në tragjedi më pak se 6 vjet e gjysmë më vonë.
Neilia pati një rol vendimtar në fushatën e Xho për në Senat në vitin 1972
Ndërsa udhëtimi i tyre i përbashkët i çoi në Sirakuza dhe më pas në Uillmington, çifti bëri plane që Xho të bëhej një avokat gjyqesh, dhe më pas të garonte për zyra publike. “Ne ramë dakord për pothuajse gjithçka”, shkroi ai, përveç shpresës së Neilias që burri i saj të zgjidhej anëtar i Gjykatës së Lartë të SHBA-së.
Neilia lindi Xhozef “Bio” Bajden III në shkurtin e vitit 1969, Robert “Hanter” Bajden në shkurtin e vitit 1970, dhe Naomi “Emi” Bajden në nëntorin e vitit 1971. Ndërkohë, përpjekja e parë e Xho për t’u futur në politikë ishte e suksesshme me zgjedhjen e tij në Këshillin e Qarkut të Nju Kasëllit në vitin 1970.
Dy vjet më vonë, Neilia mori një rol kryesor në fushatën e Xho Bajden kundër republikanit J.Bogs për në Senatin e SHBA-së, duke shërbyer siç do ta quante bashkëshorti i saj “truri i operacionit”. Pas Ditës së Zgjedhjeve, sfidanti që ende nuk i kishte mbushur të 30-at ishte bërë personi i dytë më i ri i zgjedhur ndonjëherë në Senat, duke e çuar çiftin Bajden të pyeste se çfarë mund të vinte pas ngritjes së tyre të shpejtë në politikë.
Makina e Bajden u godit nga një kamion një javë para Krishtlindjes
Përgjigjja erdhi më 18 dhjetor, një të hënë kur Xho po shkonte në zyrën e tij të përkohshme në Uashington, ndërsa Neilia qëndroi në shtëpinë e tyre të re në verilindje të Delauer, për të bërë disa pazare për festën e Krishtlindjes.
Rreth orës 14:30 të pasdites, Neilia po udhëtonte me makinë drejt perëndimit në një rrugë rurale në Luginën Hokesin, me tre fëmijët që ishin në sedijen e pasme. Makina u godit befas nga një kamion që po ecte me shpejtësi në një kryqëzim. Sipas raportit të policisë, përplasja e hodhi makinën 50 metra në një monopat.
Gruaja me 3 fëmijët u nxorën me shpejtësi nga makina e shkatërruar, dhe u dërguan me urgjencë në Spitalin e Përgjithshëm të Uillmingtonit. Por ishte tepër vonë për Neilian dhe Emin 13-muajshe, të cilat u shpallën të vdekura sapo mbërritën në spital. Të dy djemtë ishin më me fat, megjithëse Bio theu njërën këmbë, ndërsa Hanter pati një të çarë në kokë.
Xho e kuptoi menjëherë se kishte ndodhur diçka e tmerrshme
Sikurse kujton Xho në librin e tij autobiografik, ai e kuptoi se diçka e tmerrshme kishte ndodhur kur pa fytyrën e zbehtë të motrës së tij pasi iu përgjigj telefonit që ra në zyrën e tij atë pasdite. Një ndjenjë e tmerrshme e humbjes së Neilias u rriti menjëherë kur Valeri i sugjeroi të ktheheshin në shtëpi për shkak të një “aksidenti të lehtë”.
“Ajo ka vdekur, apo jo?”, u përgjigj ai. Udhëtimi i shpejtë për në Uillmington konfirmoi dyshimet e tij më të këqija. Por Xho nuk pati mundësi të qante humbjen e bashkëshortes dhe të vajzës, për shkak se 2 djemtë e tij të vegjël ishin ende në rrezik për jetën.
Në atë moment, kujton ai, vetëvrasja iu duk si një mundësi joshëse, edhe pse e dinte se nuk mund të braktiste kurrë Bion dhe Hanterin, në kushtet kur nëna dhe motra e tyre kishin ndërruar jetë. Xho u tërbua nga zemërimi kur policia e përjashtoi shoferin e kamionit nga çdo lloj përgjegjësie për aksidentin.
Më vonë u zbulua se Neilia ishte ose me shpejtësi mbi normat ose ishte e shpërqendruar nga fëmijët në sediljen e pasme. Dhe ndërsa po merrte zemër nga përmirësimi gradual i gjendjes së 2 djemve, Bajden e pa veten të konsumohej nga zemërimi që i vlonte. Disa herë dilte bridhte natën rrugëve të qytetit me shpresën se dikush do të përleshej fizikisht me të.
Ai e mori veten nga ajo humbje, duke u fokusuar tek mirëqenia e djemve të tij të mbijetuar
Me ndihmën e kolegëve të tij në Senat dhe mbështetjen e motrës, Xho u rikthye në detyrë. Edhe pse fokusi i tij kryesor ishte mirëqenia e Bio dhe Hanter, kjo i dha mundësi të treve të vazhdonin jetën e tyre. Një grua tjetër hyri në jetën e tij kur i vëllai i tij e njohu me studenten e Universitetit të Delauerit Xhill Xhejkëbs në vitin 1975.
Dhe kur u bë e qartë se Xhill ishte një pjesë e domosdoshme e familjes së tyre, ishin djemtë ata që e shtynë të atin të martohej me të. Pak para dasmës së tyre në vitin 1977, Xho e pyeti të fejuarën e tij se si mund të pranonte ajo të martohej më të, duke ditur ndjenjat e tij për gruan e tij të parë.
“Kushdo që mund të dashurojë aq fort një herë, mund ta bëjë sërish atë!”, u përgjigj ajo. “Ai ishte momenti kur unë e kuptova saktësisht se çfarë kishte bërë dashuria e Xhill për mua. Ajo më kishte dhënë sërish mundësinë të isha vetvetja”, shkruan Xho Bajden në librin e tij autobiografik.
Burimi: https://https://www.biography.com/news/joe-biden-first-wife-daughter-car-accident-story”
Përshtatur nga TIRANA TODAY
