Kryeministri Edi Rama në mbledhjen e grupit parlamentar të Partisë Socialiste ishte tërësisht shpërfytyruar teksa i duhej të merrte në mbrojtje familjen e Fatmir Xhafajt pas skandalit të fundit me audio-përgjimin ku vëllai i ministrit të Brendshëm, Agron Xhafaj drejtonte trafikun e drogës.
Ai nuk harroi të përdorte ironinë, të cilin e ka instrumentin e fundit kur nuk ka shumë për të thënë. Për këtë arsye, Rama filloi të kapet me opozitën dhe mediat njëkohësisht. Duke u përpjekur që akuzat në drejtim të vëllezërve Xhafaj t’i shndërronte në ironi, Rama u duk se e kishte humbur tërësisht toruan.
Kreu i qeverisë e cilësoi me ironi veten, qeverinë që drejton, dhe ministrin Xhafaj si kupolën mafioze të Shqipërisë dhe të Evropës. Duke i quajtur krejt qesharake akuzat e opozitës, Rama i xhindosur filloi të marrë në mbrojtje Xhafajn dhe vetë Tahirin me rastin e trafikut të drogës.
Duke luajtur me psikologjinë e shqiptarëve në raport me Evropën, Rama akuzoi opozitën se me denoncimet e saj po i nxin faqen Shqipërisë në arenën evropiane dhe po hedh në erë negocitatat.
Rama: Opozita s’po lë gur pa lëvizur dhe pabesi pa bërë. Po pengojnë dhe tentojnë të bllokojnë dhe rrëzojnë Shqipërinë në këto minuta të fundit të një rrugëtimi të gjatë drejt një stacioni historik. Po minojnë dhe hedhin në erë negociatat.
Dhe sipas tij, audio-përgjimi i Agron Xhafajt u është dërguar eurodeputetëve dhe kancelarive të Evropës me qëllim për të hedhur në erë negociatat me Bashkimin Evropian.
Megjithatë, historia politike në Shqipëri përsërit vetveten. Një aksion të tillë politik si opozita e sotme e ndërmori dikur edhe vetë sekretari Organizativ i Partisë Socialiste i asaj kohe, sot kryetar i Bashkisë së Tiranës, Erion Veliaj.
Në vitin 2011 Veliaj i dërgonte eurodeputetes për Shqipërinë, Tanja Fajon një email ku tregonte se gruaja shtatzënë e Elvis Roshit, Griselda Zaimi ishte rrëmbyer dhe më pas i ishte hequr fëmija. 
Miq! Një lajm i trishtuar na ka shokuar të gjithëve ne në PS. Natën e kaluar, gruaja shtatzënë e kryetarit të sapozgjedhur të Bashkisë së Kavajës, Elvis Roshi, u rrëmbye në një qendër tregtare në Tiranë. Pasi është keqtrajtuar barbarisht nga rrëmbyesit, ajo është dërguar në një vend të panjohur, ku i kanë hequr fëmijën. Në orën 4 të mëngjesit, e mbuluar nga gjaku, znj. Roshi është lënë afër shtëpisë së saj në Kavajë (50 kilometra larg kreqytetit). Nuk ka ende ndonjë njoftim nga policia. Kavaja ka qenë zona elektorale ku është zgjedhur Berisha deputet për 20 vjet. Socialistët fituan në Kavajë për herë të parë më 8 maj, dhe kjo është konsideruar si fitorja më simbolike e zgjedhjeve. Gjatë fushatës elektorale, z.Roshi dhe shtabi i tij kanë marrë kërcënime për shkak të garimit të tij për postin e kreut të Bashkisë. Kreu i PS, Edi Rama, do të lëshojë një deklaratë shtypi pas një ore……Duke pasur parasysh rrethanat shumë të rënda të situatës në Kavajë, ky njoftim do të jetë i shkurtër dhe më tepër informacion politik do t’ju japim nesër.
Pas marrjes së emailit, eurodeputetja Tanja Fajon e cilësoi gjendjen e të drejtave të njeriut në Shqipëri si shumë të rëndë. Por më pas u zbulua se e gjitha kishte qenë një sajesë nga vetë Griselda. Vetë opozita e asaj që sot është në pushtet nuk ngurroi t’i binte tam-tameve në kancelaritë e Brukselit, duke dështuar disa rezoluta të njëpasnjëshme të Parlamentit Evropian mbi ecurinë e integrimit të Shqipërisë në BE. 
Për këtë arsye, kur Rama iu drejtua sot opozitës se po i nxin faqen Shqipërisë me denoncimin e saj të fundit, ku dëgjohet vëllai i Fatmir Xhafajt që drejton trafikun e drogës, harron rastin kur ai bashkë me Veliajn dërgonin drejt Brukselit sajesa të atilla si ajo e Griselda Zaimit.
TIRANA TODAY
