Presidenti i Serbisë, Aleksandar Vuçiç, shprehet se nuk shqetësohet se mund të humbasë pushtetin politik mes protestave masive që kanë shpërthyer në Beograd.
Sipas Vuçiç, shqetësimi i tij i vetëm është se protestat mund të ndikojnë në përhapjen e koronavirusit.
“ Është papërgjegjshmëri t`i mbledhësh njerëzit të protestojnë kur përballemi me shifra të tmerrshme infektimi nga koronavirusi. Askush nuk e merr pushtetin me forcë. Pushteti merret me zgjedhje”, tha ai.
Qindra demonstrues u përleshën përsëri me policinë përpara parlamentit të Serbisë. Protestat që nisën në 7 korrik kundër masave ndaj pandemisë, tashmë janë shndërruar në lëvizje antiqeveritare. Policia përdori gazlotsjellës për të shtyrë prapa protestuesit dhe për t’i parandaluar ata të hynin në godinën e Kuvendit.
