Elton Metaj mori dënimin “arrest me burg”, pasi vrau ish-bashkëshorten e tij Sabrina Bengaj. 31-vjeçari ekzekutoi ma kallashnikov ish-gruan, 23 vjeç, në banesën e kësaj të fundit në Zhupan të Fierit, mbrëmjen e së premtes.
Ai shkoi në shtëpinë e ish-bashkëshortes dhe e qëlloi për vdekje, ndërkohë që kjo e fundit po konsumonte darkën.
Ai gjatë seancës u shfaq i rënduar nga gjendja psikologjike. Gjatë seancës ka qarë, dhe për këtë arsye është ndërprerë seanca, për të filluar pak minuta më vonë.
Burimet bëjnë me dije se 31-vjeçari ka fajësuar familjarët e së ndjerës, se krimin e rëndë e ka kryer edhe pas presioneve të vazhdueshme nga vjehrri. “Më ka bërë presion vjehrri, më ka kërcënuar”, ka thënë ai. “E mora armën për vetëmbrojtje”, tha Metaj.
Ai është shprehur se e donte ende ish-bashkëshorten, të cilës i mori jetën me bukë në gojë.
Familjarët e Sabrina Bengaj thanë një ditë më parë se Metaj ushtronte dhunë ndaj saj, duke kërkuar që të vihen përpara drejtësisë edhe prokurorët dhe gjyqtarët që e liruan pas pengmarrjes që ai i bëri 1 vit më parë familjes së ish-gruas.
