Gjykata e Apelit Tiranë ka dënuar me 18 vite burg ish-policin Nevaldo Hajdaraj, i cili u shpall fajtor për vrasjen e Klodian Rashës. Për shkak të gjykimit të shkurtuar, dënimi iu reduktua në 12 vite burg. Babai i Klodianit, Qazim Rasha, u shpreh se është përballë një padrejtësie.
“Jam një prind përballë një padrejtësie dhe ju, gjyqtarët jeni ata që duhet ta vendosni atë për të më lehtësuar edhe mua. Pretendimet e avokatëve dhe të pandehurit për rrezik, janë lojëra dhe një telenovelë që s’e beson asnjëri, ato nuk qëndrojnë”.
Ish-efektivi Nevaldo Hajdaraj akuzohet për vrasjen e Klodian Rashës, ngjarje e ndodhur më 8 Dhjetor 2020, në rrugën “Dritan Hoxha” në Tiranë.
Gjykata e Tiranës e kishte dënuar Nevaldo Hajdarajn me 15 vite burg, nga të cilat do të vuante 10 vite për shkak të gjykimit të shkurtuar.
Por Apeli i Tiranës prishi këtë vendim, duke e dënuar me 18 vite ish-efektivin e forcave “Shqiponja”, nga të cilat do të vuajë 12.
Prokuroria kërkoi që Nevaldo Hajdaraj të dënohej me 20 vite burg dhe të mos i pranohej gjykimi i shkurtuar. Por gjykata nuk e mori parasysh. Ndërsa pala mbrojtëse kërkoi që Nevaldo Hajdarajt t’i rrëzohej akuza e “vrasjes me dashje”, për shkak se u vetëmbrojt, por edhe kjo kërkesë u rrëzua nga trupa gjykuese.
