Gjykata e Tiranës ka pranuar masën e sigurisë “Arrest me burg” për dy vëllezërit Fredi dhe Pajtim Rrushi, pasi akuzohen për vrasjen e biznesmenit Ruzhdi Hoxha. Gjatë seancës gjyqësore, ata nuk kanë treguar asnjë detaj për ngjarjen.
Vrasja e biznesmenit Ruzhdi Hoxha ka ndodhur mes natës 21 dhe 22 tetorit, trupi i të cilit u gjet në zonën e Dajtit rreth dy javë pas zhdukjes.
Fredi Rrushi dhe vëllai i tij Pajtim Rrushi janë lënë në burg nga Gjykata e Tiranës, si autorë të dyshuar për vrasjen e biznesmenit të inerteve, Ruzhdi Hoxha. Ndërkohë që ende nuk ka asnjë motiv se pse dy vëllezërit e kanë vrarë mikun e tyre.
Si ndodhi krimi? Biznesmeni i ndjerë, pasi është rrëmbyer, është dhunuar fizikisht dhe më pas është ekzekutuar me dy plumba në Qafë Mollë në Dajt. Më tej është hedhur në një humnerë dhe mbuluar me gurë e gjethe për të mos u gjetur.
Trupi i pajetë i Ruzhdi Hoxhës është gjetur më 5 nëntor, përmes qenëve të policisë, ndërsa ishte shpallur i zhdukur dy javë më parë nga familjarët e tij.
