Gjykata e Tiranës nisi gjykimin për Esat Canin, motrën dhe ish-kunatin e tij, të akuzuar për vdekjen e Arben Gjeçit. Ky i fundit u godit me shufër hekuri nga Esat Cani një vit më parë, ndërsa Elida Cani dhe Dëfrim Kurti, bashkëshortë, me veprimet e tyre penguan zbardhjen e ngjarjes. Gjykata pranoi gjykimin e shkurtuar për tre të pandehurit, nga e cila në rast fajësie, ata do të përfitojnë ulje të dënimit.
Vrasja për çështje nderi
Vrasja ka ndodhur në datën 24 janar të 2019-ës, ku sipas Prokurorisë, Esat Cani ka vrarë për çështje nderi Arben Gjeçin, i cili kishte një lidhje jashtëmartesore me motrën e tij, Elida Canin.
Sipas dosjes hetimore, ka qenë një udhëtim me furgon në tetor të 2018-s, që ka bërë që Esat Cani të dyshonte se viktima Arben Gjeçi kishte një lidhje jashtëmartesore me motrën e tij, dhe për këtë arsye i ka ruajtur.
Ky vëzhgim ka zgjatur deri në datën 24 janar. Pasi kishte lënë punën, ka marrë shufrën e hekurit me vete dhe ka shkuar pranë banesës së motrës për të parë nëse Gjeçi do ta takonte atë. Nga ana tjetër, në dëshminë e dhënë 20-vjeçarja ka pranuar lidhjen me viktimën, ndërsa ka treguar për takimin e pasdites së 24 janarit. “Kam dëgjuar zhurmë goditje”, ka thënë ajo, ndërsa ka shpjeguar për hetuesit se nuk e kishte parë personin që qëlloi. Në momentin që ka shkuar të shikonte, ishte vetëm trupi i gjakosur i Arben Gjeçit, i cili, sipas saj, përpëlitej dhe nuk thoshte asnjë fjalë.
