Pas krimit makabër, bashkëshortja e 47-vjeçarit Kastriot Reçi është marrë në pyetje nga policia, për të mësuar nëse viktima kishte pasur ndonjë kërcënim apo konflikt. Po kështu mësohet se janë marrrë në pyetje edhe dëshmitarë të tjerë, për të zbardhur rrethanat e ngjarjes apo lëvizjet e biznesmenit.
Dyshohet se vrasja ka lidhje me një histori bandash, dhe është bërë për hakmarrje. Dy vite e 8 muaj më parë, 47-vjeçarit i kishin vrarë të vëllain, Gaspër Reçi në Itali.
Një snajper është gjetur në tarracën e një pallati, vetëm pak orë pas ekzekutimit të Kastriot Reçit. Grupi hetimor dyshon se snajperi mund të ketë lidhje me ekzekutimin e 47 vjeçarit.
Ngjarja ka ndodhur paraditen e kësaj të marte (7 janar), rreth orës 11:00 në qendër të qytetit të Rrëshenit.
Dëshmitarët kanë thënë se nuk kanë dëgjuar të shtëna, por kanë parë vetëm viktimën të shtrihet në tokë.
“Sot, rreth orës 11:05, në afërsi të një lokali në Rreshen, Mirditë, në rrethana ende të paqarta është vrarë me armë zjarri shtetasi K.R., 47 vjeç. Grupi hetimor po punon për zbardhjen e rrethanave të ngjarjes, me qëllim identifikimin dhe kapjen e autorit/eve. Shërbimet e Policisë të D.V.P. Lezhë, të Komisariatit të Policisë Mirditë, po krehin zonën si dhe janë ngritur pika kontrolli për kapjen e autorit/eve”, thuhet në njoftimin e policisë.
Ekzekutimi i sotëm me snajper i Kastriot Reçit në Rrëshen, ka ngritur në këmbë gjithë strukturat e shtetit. Drejt Rrëshenit është nisur edhe ministri Sandër Lleshaj dhe drejtori i Policisë së Shtetit, Ardi Veliu.
Vrasja e biznesmenit/ Policia gjen provën e fortë që mund të çojë tek autorët
