Pas avokatëve të Elbasanit edhe ata të Korçës kanë vendosur të ndërpresin punën për tre ditë, në shenjë proteste për vrasjen e avokatit të njohur Ravik Gurra, i cili u vra në qendër të qytetit të Elbasanit.
Gjatë mbledhjes së djeshme të Dhomës së Avokatisë në Elbasan, u vendos bojkot 1 javor i proceseve gjyqësore.
Sipas tyre, kjo ngjarje kriminale rikujton se sa të pa mbrojtur dhe të rrezikuar ndihen avokatët.
“Vrasja e avokatit Ravik Gurra ka tronditur opinionin publik mbarëshqiptar. Për 3 ditë do të ndërpresim dhënien e shërbimeve. Nuk do të ketë shërbime nga e mërkura deri të premten. Vendimi nuk është i vlefshëm vetëm për seancat ku jepen masat e sigurisë. Për avokatët që do të thyejnë këtë urdhër, do të ketë masa disiplinore”, tha dje Dhoma e Avokatisë.
Ngjarja e rëndë ndodhi pranë një lokali të njohur në qendër të qytetit të Elbasanit në datën 22 mars dhe autori dyshohet se ka qenë i maskuar.
Viktima, Gurra, që njihet për mbrojtjen e çështjeve të bujshme si ajo e Çapjave dhe Shullazit, ka qenë i ulur në ambientet e lokalit jashtë kur është qëlluar pas koke. Ai ishte i shoqëruar me dy persona të tjerë në tavolinë, njëri prej tyre gjithashtu avokat. Autori që e ka qëlluar me pistoletë është larguar me një mjet që është gjetur i djegur në dalje të qytetit të Elbasanit.
