Avokatët në qytetin e Elbasanit kanë vendosur të bojkotojnë proceset gjyqësore për pesë ditë në shenjë proteste, pas vrasjes së kolegut të tyre Ravik Gurra para pak ditësh, ndërsa theksojnë se ndihen të rrezikuar dhe të pa mbrojtur.
“Ky ishte një veprim nga dora kriminale ndaj kolegut tonë. Bojkot proceseve gjyqësore në Elbasan. Ndihemi të rrezikuar” u shpreh Hysen Kovaçi.
Kujtojmë që ditën e premte reagoi kreu i Dhomës Kombëtare të Avokatisë, Maks Haxhia i cili deklaroi se do të diskutohet vendimi për t’u bojkotuar të gjitha gjykatat në vend.
Ravik Gurra, mbrojtësi ligjor i Çapajve, fisit të njohur në Elbasan, u ekzekutua me silenciator me dy plumba në kokë teksa ishte ulur në një lokal duke pirë kafe shumë pranë qendrës së qytetit.
50-vjeçari me shtetësi angleze bënte një jetë mes Shqipërisë dhe Anglisë. Deri tani nuk ka asnjë person të arrestuar për vrasjen mafioze.
