Vrasja e liderit serb në veri të Motrovicës, ishte një ngjarje që mendohej se do të pengonte dialogun Kosovë-Serbi, por kjo nuk ka ndikuar në ngrirjen e bisedimeve, pasi palët po punojnë për një dialog sa më konstruktiv, kjo e ndihmuar edhe me ndërmjetësimin e ndërkombëtarëve.
Duket se kur kanë kaluar disa ditë nga vrasja e Ivanoviçit, hetimet e ngritura për këtë atentat mafioz, kanë grumbulluar prova dhe fakte të reja. Kryeprokurori i Shtetit, Aleksandër Lumezi ka deklaruar se kanë prova për vrasjen e ish-liderit serb Oliver Ivanoviç.
Ky rast është duke u hetuar nga Prokuroria Themelore e Mitrovicës, dhe me të po merren një prokuror shqiptar dhe një serb.
“Ne i kemi disa prova, të cilat i kemi siguruar deri tani, mirëpo nevojitet që ende të marrim veprime për zbulimin e identitetit të kryerësit të veprës penale”, tha Lumezi.
Sipas Lumezit shteti i Serbisë pavarësisht kërkesave nuk po bashkëpunon me organet e drejtësisë kosovare për zbardhjen e identitetit të vrasësit.
“Ka pasur kërkesa edhe nga autoritetet e Serbisë që të bashkëpunojmë në këtë drejtim, mirëpo ne u kemi thënë se ne jemi të gatshëm të t’i marrim të gjitha informacionet të cilat ata eventualisht i posedojnë për vrasjen e Oliver Ivanoviçit, siç është e paraparë edhe me ligjin për Bashkëpunim Ndërkombëtar. Nuk na kanë dhënë ende informacione, jemi duke pritur”, shprehet Kryeprokurori Lumezi.
