Gazetarja Klodiana Lala e ftuar në emisionin “Të paekspozuarit” mbrëmjen e djeshme tha se ekzekutimi i avokatit Ravik Gurra në Elbasan ka tronditur sistemin e drejtësisë.
Sipas saj, avokatët, prokurorët dhe gjyqtarët ndihen të rrezikuar e të pa mbrojtur, ndërsa shton se vrasja dyshohet të jetë bërë më pagesë.
Më tej, gazetarja nënvizon se një pjesë e policisë në Elbasan është e inkriminuar.
“Vrasja e avokatit ka bërë që të tronditet sistemi i drejtësisë. Kjo bën që të ketë frikë te avokatët, prokurorët, gjyqtarët. Vrasja ka dyshime se është bërë me pagesë, por kjo nuk është kategorike, pasi hetimet do të tregojnë përfundimin. Unë kam qenë vetë në Elbasan. Mund të them, duke njohur terrenin nga afër, se një pjesë e policisë në Elbasan është e inkriminuar. Në Elbasan, vrasja është regjistruar me kamera dhe është ose paaftësia totale ose inkriminimi arsyeja se pse nuk zbardhet ngjarja”, tha Lala.
