Vrasja e bujshme e njeriut që kryesoi lëvizjen studentore të dhjetorit të vitit 1990, ka ngjallur vazhdimisht debate në arenën politike. Vrasja e deputetit Azem Hajdari, e tronditi nga themelet shtetin shqiptar. Njeriu simbol i rrëzimit të sistemit komunist teksa drejtoi lëvizjen studentore në dhjetor 1990, u vra duke shënuar kulmin e të gjitha vrasjeve politike në Shqipëri, që nga themelimi i shtetit. Zv/ministri i Mbrojtjes, Petro Koçi, gjatë një prononcimi për gazetën “SOT”, thotë se vrasja e ish-deputetit Azem Hajdari, i shërbente Partisë Demokratike dhe liderit të saj, Sali Berisha. Sipas tij, vrasja e Hajdarit ishte paralajmëruar edhe nga gazeta “Rilindja Demokratike”.
“Vrasja e Azem Hajdarit e tronditi rëndë situatën politike, e cila sapo po dilte nga trauma dramatike e ’97-së.
PD kishte paralajmëruar gjendje lufte në ditët që i paraprinë vrasjes. Po të lexosh gazetën “Rilindja Demokratike” të datave 8, 9, 10, 11 dhe 12 shtator, e kupton që PD-së i duhej kjo vrasje.
Kjo është një rrethanë që nuk është marrë kurrë parasysh nga drejtësia. Berisha vrapoi të fajësonte Fatos Nanon.
Dhe ky vrap nuk është marrë në konsideratë. Ndërsa tani kemi deponimet publike të ish-bodiguardit të Sali Berishës.
Nuk ka më justifikime për të mos e hapur çështjen. Hapja e mundshme e kësaj çështje është një nga motivet që ndërsyen Sali Berishën kundër Reformës në Drejtësi. Për mua vrasja e Azemit ishte edhe larje hesapesh brenda PD”, deklaroi zv/ministri i Mbrojtjes, Petro Koçi.
