Gazetari Artan Hoxha, pasi ka analizuar ngjarjen e rëndë ku u ekzekutua 25-vjeçari Klodjan Rasha nga ana e policisë, ka nxjerrë disa detaje të dyshimta. Sipas tij, është marrë një veprim i gabuar nga ana e policit. Ku ka nisur nga një kundravajtje dhe është pasuar me një kundërveprim të policisë, me tejkalim të ligjit për përdorimin e armës. I ftuar në studion ‘Abcnews’, ai tha se vrasja duhet të zbardhet sa më parë, ndërsa në vendin e ngjarjes kemi armën e bllokuar dhe kamerat e sigurisë.
“Për mua është e qartë ngjarja. Ka nisur nga një kundravajtje dhe është pasuar me një kundërveprim të policisë me tejkalim të ligjit për përdorimin e armës. Është marrë një veprim i gabuar.
Për këtë rast, për shkak të pasojave duhet një hetim shumë i shpejtë. Është një hetim që e ka përjashtuar policinë. Ndryshe nga shumë ngjarje që prokuroria pret afatet e veta, kjo është një ngjarje që kemi vendin e ngjarjes, armën e bllokuar, kamerat e sigurisë. Është një hetim që duhet të mbyllet në kohë rekord”, tha ai.
Gazetari u pyet nëse ka patur tentativë nga policia për të devijuar nga e vërteta. Nga ana e policisë ka patur dy reagime. Nga hetimet paraprake, arma e gjetur nuk ka lidhje me ngjarjen.
“Policia ka bërë një reagim fillestar, pastaj një reagim të dytë. Bëhet fjalë për të dytën që u gjet një armë, që deri tani nuk ka një rezultat se e kujt është. Një armë që duket pa lidhje me ngjarjen nga e vërteta. Nga të dhënat e deritanishme, ajo del që nuk ka lidhje direkte me këtë ngjarje.
Po e zëmë se kemi të bëjmë me një të ri problematik. Çfarë pastaj, se duhet ta vrasim? Kjo ndodh që pasi ndodh një akt i rëndë, i fut këtë pjesën që ka pasur precedent. Precedent quhet edhe një gjobë. Nisemi me ngjarjen reale. Është fakt që pas orës 22:00 kemi orën policore. Por kjo nuk do të thotë që çdo njeri që është në rrugë pas kësaj ore, është subjekt kriminal. Një njeri që nuk mban maskë, nuk do të thotë se është kriminel. Për fat të mirë, policia shqiptare nuk i përdor armët. Madje është akuzuar për të kundërtën që toleron.
Nëse ky i riu do kishte ikur, do merreshin kamerat, do të shoqërohej ai dhe aty mbyllej. Çdo gjë që do të publikohet në këtë moment si spekulim. Më mirë t’ja lëmë hetimit. Polici është palë në këtë rast. Pasojat kanë ardhur si pasojë e vendimit të tij”, tha Hoxha.
Pak çaste më parë, të rinjtë e FRPD-së marshuan para Ministrisë së Brendshme dhe Kryeministrisë për vrasjen e 25-vjeçarit, Klodjan Rashës, i cili u vra nga efektivi i policisë.
Të pajisur me çadra, pankarta në duar, të rinjtë kanë marshuar nga një institucion në tjetrin për të ngritur zërin mbi kauzën e tyre.
