Ministri i Brendshëm, Sandër Lleshaj ka folur në lidhje me miratimin e paketës “Anti-KÇK” në Kuvend.
I ftuar në emisionin “Real Story”, Lleshaj pohoi se paketa në fjalë ka ndryshuar nga varianti fillestar. Ai shtoi se për këtë paketë kanë punuar shumë ekspertë, në mënyrë që ta sillnin në parametra të tillë që të kalonte në Kuvend.
“Varianti final nga ai fillestar ka ndryshuar. Ka qenë proces diskutimi, janë marrë shumë ekspertë, të cilët kanë punuar fortë për ta sjellë ligjin në ato parametra që të jetë i pjekur për të kaluar në Kuvend. Ka pasur shumë ndryshime”, tha ai.
Lleshaj u pyet edhe në lidhje me mungesën ish-ministrit, Fatmir Xhafaj në votim. Ai deklaroi se nuk e ka vënë re dhe refuzoi të jepte koment për këtë pjesë.
“Sot nuk e kam vënë re mungesën e z.Xhafaj për të qenë fare i sinqertë. Ka qenë një ditë e ngarkuar, gjithë ditën në Kuvend por nuk do ta komentoja. Nuk komentoj paraardhësit, e kam si princip”, tha ministri Lleshaj.
