Ish-deputetja demokrate Albana Vokshi akuzoi në një deklaratë për media kryeministrin Edi Rama dhe kryebashkiakun Erion Veliaj se po shkelin ligjin.
“Edi Rama dhe Erion Veliaj po mbajnë në fshehtësi të plotë kompanitë që kanë shfaqur interesin për projektin mafioz të shkatërrimit të Teatrit Kombëtar dhe ndërtimit në truallin e tij dhe në pronën tjetër publike të 6 kullave, ku do të pastrohen paratë e pista nga droga dhe korrupsioni”, tha Zonja Vokshi.
Ajo theksoi se 19 shtatori ishte afati i fundit kur kompanitë duhet të dorëzonin dokumentet, “por gati 2 javë pas skadimit të këtij afati, as qeveria, as bashkia nuk bëjnë publike emrat e kompanive që kanë shfaqur interesin për t’u bërë pjesë e planit 200 milionë euro të Edi Ramës”. Ish-deputetja demokrate tha se partia e saj do të ndjekë rrugën ligjore “për të vënë para drejtësisë bashkëpunëtorin e Edi Ramës në veprën korruptive të grabitjes së tokës publike dhe shkatërrimit të trashëgimisë kulturore të Tiranës, Bjarke Ingels”.
Ajo tha gjithashtu se kompania “Fusha SHPK e cila ka përfituar 100 milionë euro tendera publikë 5 vitet e fundit, do të përballet me Ligjin e ri Antimafia”.
