Të paktën 1 ton drogë dhe 6 armë zjarri janë sekuestruar në Vlorë, në lagjen “1 Maji”.
Operacioni u zhvillua rreth orës 01:00 të ditës së sotme, rreth 30 metra larg Portit të Vlorës.
Droga u gjet në një banesë private të pabanuar, e mbështjellë me natriban në 49 pako të mëdha, ku brenda tyre kishte lëndë narkotike të dyshuar Cannabis Sativa, me peshë totale 1030 kilogramë .
Gjithashtu, gjatë operacionit u sekuestruan edhe 6 armë zjarri, 3 nga të cilat kallashnikov dhe 3 pistoleta, si dhe municion luftarak.
Në gomone ishin tre trafikantët, të cilët ishin përgatitur ta transportonin lëndën narkotike drejt Italisë. Por, në momentin që ka ndërhyrë Policia, shtetasit G.S., A.I., J.S., kanë përfituar duke u larguar me shpejtësi të madhe me gomone në hapësirën detare.
Në ndjekje të tyre janë vënë Policia Kufitare, Delta Forcë e GdF, ku ende vijon kontrolli në det për kapjen e tyre.
Vijon operacioni për gjetjen dhe kapjen e tre shtetasve, si dhe vijojnë hetimet për dokumentimin e plotë të kësaj vepre penale.
