Vjosa Osmani nga Lidhja Demokratike e Kosovës është zgjedhur kryetare e Kuvendit të Kosovës. Deputetja Osmani është propozuar për kryetare të Kuvendit nga Lëvizja Vetëvendosje, pasi kryetari Glauk Konjufca sot ka dhënë dorëheqjen nga ky post, pasi është zgjedhur ministër i Punëve të Jashtme në Qeverinë Kurti.
“Është nder shumë i madh që sot me besimin tuaj të zgjedhem që ta drejtojë Kuvendin e Kosovës për katër vitet e ardhshme”, ka thënë Osmani.
Kryeparlamentarja e zgjedhur ka premtuar debat demokratik, gjuha korrekte ndaj njëri-tjetrit gjatë udhëheqjes së saj.
Pak më herët, Albin Kurti u votua si kryeministri i ri i Kosovës. Ai është betuar dhe ka mbajtur një fjalë të shkurtër për qeverisjen e tij.
Në fjalën e tij, Kurti është shprehur se tanimë është koha që politika të punojë për popullin. Nga foltorja e Kuvendit, Kurti i ka bërë thirrje gjithë nëpunësve të administratës, që të jenë sa më pranë shtetit të së drejtës.
