Dy ndeshjet më të rëndësishme të javës së 21 në kampionatin shqiptar nuk kanë prodhuar gola. Skënderbeu ka marrë tre pikë në një përballje mjaft të vështirë me Partizanin, falë një goli të shënuar nga vetë këta të fundit. Korçarët kanë mundur të kuqtë me rezultatin minimal 1-0, falë autogolit të realizuar nga Gojkovic në të 62’, ndërsa durrsakët kanë ndalur Flamurtarin në barazim pa gola, 0-0.
Një ndeshje mjaft e kujdesshme nga të dyja ekipet u zhvillua në Korçë, duke ditur rrezikun dhe cilësitë që kishte kundërshtari ata vendosën të kujdesen që të mos pësojnë. Partizani ishte më dominues dhe e kërkoi më shumë rrugën e rrjetës më Bardhin, Prognin dhe Asanin, por nuk arritën që të mposhtin Shehin.
Ndeshja u zhbllokua në minutën e 62’, falë një autogoli të shënuar nga Gojkovic, ai që në tentativë për të fituar duelin me sulmuesin e Skënderbeut dhe me qëllim për të larguar rrezikun, ka goditur topin me kokë, duke e dërguar atë në portën e skuadrës së Partizanit, të mbrojtur nga portieri Alban Hoxha, absolutisht i pafuqishëm për të shmangur autogolin. Pas kësaj fitore, skuadra bardhekuqe shkon në kuotën e 49 pikëve, për të ruajtur e pashqetësuar kryesimin, ndërsa Partizani rrezikon vendin e 6-të, i kërcënuar nga Luftëtari që të dielën do të ndeshet me Vllazninë.
Nuk ka fitues në sfidën e bregdetit, me Teutën që ka ndalur në shtëpi ekipin e Flamurtarit me rezultatin 0-0. Me pikën e siguruar në Durrës, vlonjatët arrijnë të mbajnë vendin e dytë të klasifikimit në kuotën e 36 pikëve, edhe pse tashmë me vetëm 1 pikë më shumë se Kukësi i vendit të tretë. Nga ana tjetër, durrsakët shkojnë në kuotën e 18 pikëve, për të minimizuar distancën nga vendi i tetë, aty ku qëndron Vllazia me 3 pikë më shumë, në pritje për tu ndeshur të dielën ndaj Luftëtarit.
