Nga Anxhela Ferra
Prej datës 13 nëntor për pesë ditë me radhë, është duke u mbajtur edicioni i 22-të i Panairit të Librit. Janë rreth 100 pavijone ekspozuese nga të gjithë trevat shqipfolëse që janë bërë pjesë e edicionit. Edhe pse në organizim nuk ka shumë ndryshim nga vitet e kaluara, këtë vit ka një sërë emrash të rinj. Të cilët janë prezantuar me botimet e tyre të para. Një ditë para mbylljes së edicionit, Tirana Today pyeti disa nga personazhet publike dhe të rinjt se si e shohin këtë edicion. Dhe se cilët libra kanë zgjedhur ata të blejnë.
“Panairi ka shumë trafik, por nuk shoh blerje te njerëzit kur dalin. Shoh thjesht vizitorë që vijnë me një pasion të madh. Por, ky pasioni mbaron aty te dera. Për mendimin tim, kjo gjë ndodh sepse nuk ka arritur kultura në atë nivel akoma. Unë personalisht kam blerë gjithë këto vite për djalin tim, tani kam filluar të blejë literaturë të huaj.
Ndaj sot edhe unë kam ardhur si vizitore. Nuk kam blerë as unë te Panairi. Plus edhe nuk i kam prezantuar librat e mi këtë vit, se kam pasur disa projekte jashtë vendit. Për mua ka qenë një humbje kohe Panairi, sepse nuk kishte të paktën një interes. Që të vinin e të pyesnin se për çfarë fliste libri. Edhe pse është art”, u shpreh pedagogia Riselda Sejdija.
“Panairi është shumë i bukur. Të shohim se çfarë librash do të blejmë, çfarë të ketë”, foli për Tirana Today ish-Guvernatori i Bankës së Shqipërisë, Ardian Fullani.
Ndërsa, botuesja Arlinda Dudaj thotë se pjesëmarrja në Panair është e kënaqshme. Një pjesëmarrje e cila është vënë re në pesë vitet e fundit, ku ka pasur interesim.
“Është e kënaqshme, padyshim që është një situatë pozitive dhe optimiste. Shpresoj që kjo zhurmë të vëzhdojë edhe pasi të mbyllet Panairi. Por, natyrisht që është një festë e madhe e librit. Botimet janë nga të gjitha llojet. Është ajo kategori ku figura të njohura shkruajnë dhe shfrytëzojnë njohjen. Kemi dhe rastin si botimi i Andi Bejtjas, i cili ka mbledhur poezitë e tij më të mira. Dhe kjo është një vepër shumë e mirë. Pra, ka botime shumë komerciale, por ka edhe shkrimtarë të mëdhenj.”
Gazetari Andi Bejtja vjen këtë Panair me librin e tij me poezi. Ku sipas botueses Dudaj, është një nga librat më të shitur. Bejtja thotë për Tirana Today se edhe pse numri i njerëzve që vizitojnë Panairin është i kënaqshëm, ai shpreson që njerëzit të shtojnë edhe dëshirën për të lexuar vërtetë.
“Tani sa janë librat që lexohen, këtë nuk e kam të qartë. Se po shoh njerëzit me çanta dhe nëse vërtetë do t’i lexonin, atëherë Shqipëria do të ishte më e mirë. Mendoj se i blejnë librat dhe për publicitetin, sidomos të figurave që dalin në televizor. Ata që janë më popullorë dhe dalin përditë. Por, pavarësisht sikur 1/10 që marrin, të lexojnë janë në rregull. Unë e respektoj këdo që shkruan. Ka dhe botime të mira, siç ka edhe shkrime jo të mira. Unë nuk kam blerë akoma e kam lënë për të nesër.”
“Shumë tituj komercialë, një panair nuk mjafton”, çfarë zgjodhi Linda Rama
Ndërkohë, edhe pse numri i të rinjve të cilët vizitojnë ambientet e Pallatit të Kongreseve është i lartë, përsëri ka nga ata që nuk e marrin seriozisht Panairin.
“Akoma nuk e di ça do blejë, apo nëse do të blej. Unë kam ardhur për të parë. Nuk kam ndonjë autor të preferuar, nuk i lexoj shumë librat. Madje akoma nuk kam lexuar ndonjë libër jashtëshkollor.”
“Për mendimin tim nuk duhet të blihen libra, sepse ai që e bën është i marrë. Unë nuk kam hyrë fare brenda. Kemi ardhur të ngacmojmë gocat.”
Të pakët janë ata të rinj të cilët, përkundër “detyrimit” për të vizituar Panairin, zgjedhin të blejnë libra. Dhe janë vërtetë të interesuar për botimet. Edhe pse kryesisht vazhdohen të jenë të preferuar autorët e huaj. E më pak shkrimtarët vendas, ndonëse emrat e famshëm të këtyre të fundit, vazhdojnë të lakmohen.
“Me dëshirë do të shoh nëse ka libra në gjermanisht, apo autorë të huaj. Kurse shqiptarë do të zgjidhja vetëm ndonjë të Kadares. Nëse do të gjej ndonjë gjë të mirë, atëherë mund ta blej. Nëse jo, do të jetë thjesht leximi i përkohshëm në moment.”
“Mendoj të blej ndonjë libër të Ismail Kadares. Dhe në Maqedoni kemi Panair të Librit, por jo kaq të madh sa ky në Shqipëri. Kam ardhur posaçërisht nga andej për Panairin. Ende nuk e kam vendosur sa do të blejë, por mendoj të harxhoj deri në 100 euro.”/ TIRANA TODAY
