Bota e njeh shumë mirë historinë e mafiozit italo-amerikan, Al Capone. Ai mbetet ende sot simbol i brutalitetit, dhe luftës së egër për pushtet dhe para. Por pak njerëz e dinë se vëllai i madh i Capones ishte një punonjës shembullor i policisë amerikane.
Vincenzo Capone, ishte vetëm 16-vjeç kur u largua përgjithmonë nga shtëpia. Disa pretendojnë se u rrah nga i ati, pasi e zbuloi teksa mësonte fshehurazi t’i binte violinës. Ai shkoi në shtetet e perëndimit, dhe e ndryshoi emrin në Richard Hart. U fut në ushtri, dhe u angazhua në Evropë në Luftën e Parë Botërore. Aty fitoi medaljen më të lartë të trimërisë.
Pas luftës u zhvendos në një qytet në shtetin e Nebraskës, ku nisi të punojë si oficer policie. Vincenzo, nisi të dallohet në ndalimin e kontrabandistëve të alkoolit, veprimtari që e bëri miliarder vëllanë e tij të vogël në Çikago. Al Capone, vuri njerëz ta kërkojnë vëllanë e tij të humbur. Ata u takuan pas 16 vitesh në vitin 1924. Gangsteri i famshëm u mburrej shokëve për vëllanë e tij polic.
Hart dhe Capone, bënë një pakt për të qëndruar larg territoreve të njëri-tjetrit. Kështu secili mund të ruante reputacionin e tij. Njëri atë të mafiozit, tjetrit të policit të mirë. Por raportet mes të dyve, vazhduan të ishin të mira.
Al Capone e ndihmoi vëllanë dhe familjen e tij gjatë Depresionit të Madh. Vincenzo e zbuloi identitetin e tij të vërtetë vetëm në vitin 1951, ku dëshmoi në gjyqin e vëllait tjetër, Ralph Capone. Vdiq një vit më pas, në moshën 60-vjeçare./ TIRANA TODAY
