Koronavirusi i cili nisi të përhapej frikshëm në fund të vitit 2019 në Wuhan të Kinës, i ka marrë jetën më shumë se 3 mijë njerëzve në atë rajon.
Por një pjesë e vendasve në Wuhan nuk i besojnë këto shifra të publikuara nga autoritetet zyrtare, teksa shprehen se shifra reale sipas tyre duhet të jetë gati 42 mijë viktima.
Shifrat zyrtare tregojnë se në të gjithë Kinën, Covid-19 ka marrë 3.300 jetë njerëzish, ndërsa vetëm në Wuhan i cili ishte edhe qyteti ku shpërtheu epidemia kanë vdekur 3,182 persona.
Por banorët nuk janë të bindur për këtë, teksa thonë se 500 urna u janë dorëzuar çdo ditë familjeve në zi prej shtatë agjencive funerale të Wuhan-it.
Që do të thotë se hiri i 3.500 personave është shpërndarë çdo 24 orë. Agjencitë i kishin garantuar të afërmit e viktimave se do ta merrnin hirin përpara datës 5 Prill kur mbahet festivali Qing Ming, gjatë të cilit kinezët vizitojnë varret e paraardhësve të tyre. Në këtë mënyrë, në periudhën 12 ditore mund të shpërndaheshin 42,000 urna.
Ndërsa mediat lokale të Wuhan-it pretendojnë se agjencitë në zonën Hankou morën brenda vetëm dy ditësh dy ngarkesa me 5,000.
Kina duket se po e merr veten nga koronavirusi, i cili tashmë po shkakton pasoja të mëdha në pjesën tjetër të botës. Rastet e reja që raportohen çdo 24 orë në Kinë janë të pakta, dhe akoma më i vogël është numri i viktimave të shënuara ditët e fundit.
Wuhan ka filluar të hapë shkollat dhe institucionet tjera kryesore, edhe pse ekspertët i frikësohen një vale të dytë të kësaj epidemie në Kinë.
