Më herët u raportua se aktori i njohur i humorit Koço Devole ndodhet në gjendje të rënduar për shkak të Covid, në Spitalin Infektiv. Gjendja shëndetësore është rënduar, si pasojë e një sëmundje që aktori vuante më herët. Doktor Pëllumb Pipero ka thënë në studion e lajmeve në “Ora News”, se gjendja e tij është stabël.
“Gjendja eshte stabël. Aktori ndodhet në respiracion mekanik. Ai vuan nga një sëmundje kronike mjaft e rëndë, leukoza, por shpresojmë të bëhet mirë shpejt” u shpreh Pipero.
Artisti shqiptar Koço Devole prej 11 ditësh është infektuar me koronavirus, i shtruar në spital, aty ku po merr mjekimin e duhur.
Mirëpo gjendja shëndetësore e artistit është përkeqësuar. Mësohet se mbrëmjen e djeshme Devole është futur në intubim, pasi shëndeti i tij u rëndua.
Artisti 77-vjeçar vuan dhe nga sëmundje të tjera bashkëshoqëruse, të cilat e bëjnë edhe më të vështirë luftën e tij me koronavirusin.
Koço Devole është një nga personalitetet më të njohura të humorit shqiptar. Përveçse është një aktor i shkëlqyer humori, Devole është karikaturist, skenarist, regjisor dhe prezantues spektaklesh.
