Nëse Bashkimi Sovjetik nuk arriti që të pushtojë tërësisht Finlandën në dimrin e viteve 1939-1940, kjo është meritë e rezistencës epike të 80 mijë ushtarëve finlandezë, përballë 400 mijë trupave të Ushtrisë së Kuqe. Mes tyre, heroi kryesor është padyshim fermeri Simo Häyhä. Me pushkën e tij pa dylbi, ai arriti që në 100 ditët e luftës, të vrasë 505 ushtarë sovjetikë.
Simo ishte pjesë e betejës epike të Kollaa, ku rreth 32 finlandezë arritën t’i rezistojnë për disa orë sulmit të mbi 4000 trupave sovjetike. Të tmerruar, këta të fundit i vunë nofkën “Vdekja e Bardhë”. Përveç qetësisë dhe shenjestrës së spikatur, Simo përdorte disa teknika që i jepnin mundësi të godiste armikun, dhe të zhdukej pa lënë gjurmë. Sovjetikët dërguan për ta asgjësuar, ekipin e tyre më të mirë të snajperistëve.
Por edhe këta u vranë njëri pas tjetrit nga Simo. Në fund, u provuan bombardimet me artileri të rëndë. Dhe nga njëri prej tyre, Simo u plagos rëndë në nofull. Pas disa ditëve në koma, ai u përmend. Iu nënshtrua gjithësej 26 operacioneve kirurgjikale. Pamja e jashtme dhe zëri, nuk iu rrikthyen më si më parë. Kur e pyesnin mbi sekretin e suksesit të tij, ai përgjigjej:”Praktika”. Simo Häyhä, vdiq nga shkaqe natyrale në vitin 2002, në moshën 96-vjeçare.
