Përballja e madhe e mbrëmjes së shtunë në “Manchester Arena” ka përfunduar në raundin e tetë me një “KO”. Ishte Tony Bellew ai që ra në tapet, ndërsa boksieri ukrainas, Oleksandr Usyk nisi festën pasi mbronte titujt kampion bote në peshën “cruiserweight”.
Një sfidë që pothuajse në të gjitha raundet u dominua nga ukrainasi i pamposhtur, që në këtë përballje korri triumfin e 16-të në karrierën e tij, ku nuk ka asnjë humbje. Ndërsa për Bellew, ish-kampion i këtij Divizioni, që rikthehej në këtë peshë pas disa vitesh, kjo është humbja e tretë në karrierë, ku numëron edhe 30 fitore e një duel pa rezultat.
Dueli ishte në përgjithësi nën komandën e Usyk, që në raundin e tetë i dha fillimisht një të djathtë e më pas një të majtë të fortë në fytyrë boksierit britanik, duke e hedhur Bellew në tapet, i gjakosur në hundë.
Gjyqtari ndali duelin, duke parë që Bellew nuk mund të vijonte më edhe pse britaniku duelonte para fansave të tij, gjë që nuk mjaftoi. Bellew në të gjitha raunde ishte në vështirësi, reagonte me vonesë dhe shpesh mbështetej pas litarëve për të evituar kontaktin me Usyk, që ishte ndjeshëm, më superior në ring, duke e merituar fitoren.
Në moshën 35-vjeçare, me 30 fitore, 3 humbje e 1 duel pa rezultat, Bellew ka konfirmuar para fansave të tij në Manchester, ku zhvilloi duelin e djeshëm, se për të ka ardhur fundi. “Ky sport ka ndryshuar shumë, ndaj për mua ky është fundi”, tha Bellew.
"I have won. I sit here as a loser, heartbroken, but I have won in life."
Tony Bellew was in tears as he announced his retirement from boxing https://t.co/8Is2zhkTJd pic.twitter.com/MbFVakis4I
— BBC Sport (@BBCSport) November 11, 2018
“Bëra maksimumin në ring ndaj Usyk, por ai mbetet një boksier i jashtëzakonshëm, që meriton gjithçka, të gjithë titujt në botë. Është një boksier elite. Unë jam një boksier klasi, por diferencat mes nesh ishin të mëdha ndaj dhe ai e meritoi fitoren. Kushdo që do të përballet me të do të ketë probleme në ring. Vetëm më i miri dhe një gjigant mund të gjejë një mënyrë për ta mundur. Unë po tërhiqem me kokën lart”, tha Bellew.
