Nëse e keni dëgjuar fjalimin e saj në 2-vjetorin e “Fundjavë Ndryshe”, me siguri e mbani mend vogëlushen Etleva, e cila i përloti të gjithë!
“Mua më mungojnë shumë gjëra që shoqet e mia i kanë, nuk kam ushqime të mira e shpesh më qëllon të vë kokën në jastëk pa ngrënë. Do të doja të kisha një shtëpi të ngrohtë”, tha ajo para 2 muajsh në 2 vjetorin e Fundjavë Ndryshe.
Tashmë, viti i ri Etlevën dhe familjen e saj i gjen në një shtëpi të re. Fundjavë Ndryshe i ka dorëzuar asaj çelësat e shtëpisë duke e bërë sot atë vajzën më të lumtur në botë.
Surpriza ka qenë edhe më e madhe, teksa vajza 13-vjeçare mendonte se shtëpia ishte me qira, por Arbër Hajdari i dorëzoi asaj më vonë çelësat, duke i thënë se kjo tashmë është shtëpia e saj e re.
Rasti i saj emocionoi shumë njerëz, teksa u publikua në emisionin “Stop”, duke bërë që shqiptarët të mblidhen sërish së bashku dhe të kontribuojnë për blerjen e shtëpisë së saj.
“Shumë e lumtur ndjehem dhe e emocionuar gjithashtu”, thotë Etleva mes lotësh.
Arbër Hajdari falënderoi edhe drejtuesit e OSSHE, të cilët dhuruan një shumë monetare, duke mundësuar surprizën e madhe për Etlevën.
