Apelit të bërë publik vetëm pak ditë më parë nga Fondacioni “Fundjavë Ndryshe”, duket se po i përgjigjen shumë shqiptarë. Bëhet fjalë për historinë e 6 motrave jetime që jetojnë në fshatin Surrej, rreth 1 orë larg qytetit të Kukësit.
Mbrëmë në emisionin “Opinion”, të gazetarit Blendi Fevziu është transmetuar historia prekëse e 6 motrave, ku fati i ka braktisur duke i lënë pa nënë dhe pa babë.
I pari që ka reaguar pasi është njohur me historinë mbrëmë në emision ka qenë deputeti i PD-së Agron Shehaj, i cili është shprehur se rrogën e deputetit, për aq kohë sa do të jetë i tillë në Kuvendin e Shqipërisë, do ta dhurojë për vajzat jetime.
“Jam i detyruar dhe e bëj me kënaqësi që rrogën që e marr si deputet t’ua dhuroj këtyre vajzave për aq kohë sa unë të jem deputet”, – tha Shehaj . Ai theksoi se kjo është shumë pak, pasi është i bindur se kjo nuk është zgjidhja.
Gjashtë motrat jetime sikundër theksuam si fillim kanë bërë apel dhe u kanë kërkuar ndihmë të gjithë shqiptarëve nëpërmjet Fondacionit “Fundjavë Ndryshe”.
Fati u mori babanë 6 vite me parë, dhe nënën përpara 3 muajsh. Që nga ajo ditë, këto vajza jetime humbën kujdesin dhe dashurinë prindërore, shtëpinë, të drejtën për t’u shkolluar dhe mundësinë për të jetuar një jete normale.
Besarta është 15 vjeç dhe njëkohësisht motra e madhe. Ajo është ende e traumatizuar nga humbja e te dy prindërve dhe shtëpisë.
Motrat më të vogla, Doruntina dhe Dashamirja janë 7 vjeç. Ato sapo kishin filluar klasën e pare, por u detyruan ta lënë përgjysmë 3 muaj me parë për shkak të fatkeqësisë që i ndodhi.
Ajo që kërkojnë këto vajza është e thjeshtë: një vend që të mund ta quajnë “shtëpi” nga ku askush nuk mund t’i përzëre, një shkolle që ta frekuentojnë pa e ndërprerë, ushqim dhe dashuri nga çdokush që mund të dhurojë.
“Që kur na vdiq mami ne erdhëm këtu në fshat. Ne jemi një orë larg Kukësit. Nuk kemi njeri, jemi vetëm. Na mungon shkolla. Jemi shumë keq. Kemi frikë të rrimë këtu. Gjithçka ndodhi ngaqë vdiq mami. Në Kukës ne ishim me qira dhe xhaxhi na nxori jashtë. Por mendoj se kemi shpresën dhe do të rehatohemi si gjithë të tjetër. Mendoj se do të rehatohemi me shkollën, me shtëpinë me të gjitha gjërat. Ju bëj thirrje të gjithëve që të na ndihmojmë që të gjejmë një shtëpi dhe të rehatohemi. U bëj thirrje të gjithë njerëzve. Kam shpresën se dikush do të na ndihmojë” rrëfehet njëra nga vajzat.
Të gjithë shqiptarët por jo vetëm që dëgjojnë këtë histori rrëqethëse dhe që kanë mundësinë për të ndihmuar vajzat të cilat më shumë se kurrë kanë nevojë për mbështetje dhe përkrahje, të mos ngurojnë.
“Nga vdekja e mamit nuk kishim ku të jetonim atje, kemi qenë edhe me qira. Nuk kishte kush të na mbante atje. Na përzuri qiraxhiu i shtëpisë dhe na tha që nuk mund të iu mbaj më këtu dhe erdhëm këtu tek daja. Ne kemi frikë, jemi në mal jemi vetëm këtu. Për ne ka qenë shumë e vështirë për me jetuar këtu për tre muaj. Sepse nga vdekja e mamit dhe nga mërzia që kemi kaluar na duket se u jemi bërë bezdi edhe njerëzve të tjerë, dajës. Motrat shpeshherë qajnë dhe mezi ne mundemi që t’i qetësojmë dhe u themi që do të ikim së shpejti nga këtu. Ne kemi kaluar dimrin këtu. Ka qenë shumë ftohtë. Nuk duam që të jetojmë edhe një dimër tjetër këtu. U bëj thirrje të gjithë shqiptarëve që po na dëgjojnë që të na ndihmojmë që të ikim nga këtu”, tha mes lotësh vajza tjetër.
Kështu në faqen e saj në “Facebook”, Fondacioni “Fundjavë Ndryshe” bën një apel për të gjithë ku shkruan: “APEL PËR NDIHMË
6 vajza, si drita, jetimë, pa nënë e pa bab!
Në Kukës në familjen Poçi. Dhimbje e madhe, midis varfërisë dhe trishtimit për humbjen së fundmi të nënës së tyre.
I kemi premtuar Besartës, Fatimes, Anjezës, Dorianës, Dashmires, Dorentinës se shumë shpejt do ti bëjmë me shtëpi të re.
Do bëjmë çmos që fëmijëve të mos i mungojë gjë, e shumë shpejt ti rikthehen shkollës. Na ndihmoni të bëjmë këto vajza me shtëpi të re!
Zoti na ndihmoftë që ta finalizojmë këtë rast! Edhe nëse nuk keni mundësi të ndihmoni, shpërndani postimin!
LINKU I DHURIMIT : https://ffn.al/en/donate-2/ Të gjithë bashkë do ja dalim. “Bamirësia nuk të varfëron” #fundjavendryshe ”.
Sikundër e theksuam mbrëmë ‘Opinion’ transmetoi në hyrje të emisionit rastin e dhe u bëri thirrje gjithë institucioneve të vendit në radhë të parë, bizneseve dhe qytetarëve që t’i ndohmojnë këto gjashtë jetime që janë pa shtëpi, pa ndihmë dhe në pamundësi për të vijuar studimet e tyre. Rasti i tyre do të transmetohet në një emision të veçnatë të martën tjetër dhe ku të gjithë personat që dëshirojnë të kontribuojnë, mund t’i bashkohen nismës.
TIRANA TODAY
