“Një qytetar fiton të drejtën dhe një zyrtar largohet nga detyra. Ki besim! Nuk je aspak i vetëm përballë zyrtarit që nuk të dëgjon. Qeveria është në anën tënde”. Me këtë deklarate ministrja e Arsimit, Lindita Nikolla ka njoftuar shkarkimin kreut të drejtorisë arsimore të Malësisë së Madhe, pas një denoncimi të bërë në portalin Shqiperiaqeduam.al.
“Mjafton një mesazh në shqiperiaqeduam.al për të vënë në lëvizje qeverinë për zgjidhjen e problemit që ke me administratën. Mjafton një mesazh për të shmangur kërkesën për rryshfet në një zyrë shteti, duke marrë të drejtën e mohuar dhe ndihmuar në pastrimin e zyrave të shtetit nga grabitqarët, përmes shqiperiaqeduam.al.” thekson ministrja.
Sipas saj, “mjafton një mesazh për t’u bërë pjesë e koalcionit të madh të njerëzve të zakonshëm për Shqipërinë që duam, duke i dhënë fuqinë qeverisëse zërit të shpresave e të nevojave tuaja. S’të kushton asgjë dhe mund të bësh shumë për veten e për vendin tonë përmes shqiperiaqeduam.al”.
Gjatë fjalës së saj, Nikolla tregoi se edhe pse Gjovalin Veshtaj kishte dalë i pari në portal, vendin e punës e kishte zënë i dyti në listë. Pas këtij veprimi Veshtaj i ishte drejtuar vetë ministres për të denoncuar rastin.
“Ka aplikuar në portalin mësues për Shqipërinë, doli i pari në portal, por fatkeqësisht fitoi i dyti. Bëhet fjalë për Gjovalin Veshtaj. Ju informoj se prej ditës së djeshme qytetari që nuk heshti por e raportoi problemin tek unë, e fitoi të drejtën dhe filloi punë,” tha Ministrja
