Një prej fenomeneve më shqetësuese i cili ndodh rëndom në Shqipëri janë ngacmimet seksuale. Në rrugë, në autobusë, në park, në çdo vend publik, shumë vajza kanë rënë “pre”. Djem të rinj apo burra të moshuar, mosha nuk bën diferencë. Pasi çdo vajze i duhet të përballet me ngacmime dhe gjeste të turpshme nga maniakë të ndryshëm. Qytetaret thonë për Tirana Today se nuk ndjehen aspak të sigurta kur udhëtojnë me transportin publik, apo kur ecin në orë të vona. Duke fajësuar kryesisht internetin, pasi video të ndryshme që shohin mundohen t’i imitojnë në vende publike.
“Unë jetoj në Itali dhe andej nuk është si këtu në Shqipëri. Këtu është sikur të hanë me sy, sikur nuk kanë parë femër me sy. Janë veprime shumë të tepruara. Kur vijmë këtu nuk ndjehemi aspak të sigurta, sidomos kur kalojmë natën apo në autobusë.”
“Ashtu si shumë mikeshave të mija, edhe mua më ka ndodhur një gjë e tillë. Kur isha në autobus bënin gjeste të ndryshme, shikime, fjalë ofenduese. Rastet e maniakëve janë shtuar dhe vazhdojnë të shtohen. Por, mendoj se teknologjia ka ndikuar shumë. Interneti është bërë një prej faktorëve kryesor dhe gjërat që shohin në YouTube. Sepse më pas i imitojnë ato që shohin në internet.”
“Nuk janë të moralshme aspak këto gjëra. Të tregohesh e ashpër tregon kulturën e njeriut, por edhe ta tolerosh nuk lejohet. Tani zgjidhja e vetme është ta gjuash me bërryl edhe të kalosh.”
Sipas qytetareve policia duhet të jetë më e kujdesshme dhe kjo çështje të trajtohet më seriozisht nga institucionet përkatëse.
“Nuk kanë turp, aq logjikë kanë dhe aq mendon. E vetmja mënyrë si të mbrohesh është duke iu shmangur. Sepse për këtë gjë duhet të marr masa shteti, policia që merret dhe paguhet për atë punë.”
“Tani janë bërë të zakonshëm ata, nuk kanë më turp. Është shumë gjë e neveritshme. Nga një anë janë fëmijët për të cilët kemi frikë, pasi nuk janë të sigurt. Por, po ashtu kemi prindër vetë, imagjino ta bëjë prindi ynë atë veprim.”
“Unë punoj si kameriere dhe ka raste aty te lokali ku më ngacmojnë me fjalë nga më të ndryshme. Ka arritur në një pikë kur nuk durohen dot më. Unë jam njeri shumë nevrik, ndaj e kam të vështirë ta përmbaj veten. Por, shumë herë e kaloj me një buzëqeshje dhe largohem. Nuk ke çfarë të bësh, shteti duhet të bëjë më shumë për sigurinë tonë.”
Por, edhe pse shumë prej tyre kanë qenë “viktima” të ngacmimeve, ato përsëri shprehen se vetë vajzat janë ndonjëherë provokuese. Sipas qytetareve të pyetura nga Tirana Today, në pjesën më të madhe të rasteve, edhe vajzat janë bashkëfajtore. Pasi i ngacmojnë me veshjen e tyre, ose me sjelljen që kanë karshi meshkujve.
“Ka vajza që provokojnë me veshjet e tyre apo flirtojnë me meshkujt. Sikundër janë ato vajza të cilat janë serioze në sjelljen e tyre dhe bien viktimë e ngacmimeve. Por, mendoj se shumica flirtojnë vetë.”
“Unë kam qenë edhe jashtë, ku ndodh e njëjta gjë. Dhe gjithmonë këto gjëra ndodhin sepse provokonin gocat. Dhe shumica e rasteve ndodhnin me meshkujt e rritur, të cilët provokohen nga vajzat e reja.”
“Mua nuk më ka ndodhur ndonjëherë, por besoj se do ta injoroja asgjë më shumë. Por, unë mendoj se janë disa gjëra që vetë individi mund t’i bëjë e t’i parandalojë. Dhe një prej tyre është të mos provokohen nga vetë vajzat.”
“Si vajzat ashtu edhe këta maniakë kanë faje. Janë shtuar shumë femrat materialiste dhe kjo gjë besoj se ndikon te ata meshkuj të cilët bëjnë gjeste nga më të neveritshme.” TIRANA TODAY
