Policia greke ka lëshuar këtë të hënë një mandat arresti për presidentin e PAOK-ut, Ivan Savidis, pas incidenteve që shkaktoi gjatë ndeshjes derbi me AEK-un e Selanikut, teksa pushtoi fushën e blertë me pistoletë në brez, duke kërcënuar gjyqtarët për një gol të anuluar.
Gjithashtu mandatet e arrestit janë lëshuar edhe për katër persona të tjerë, me shumë mundësi truprojat e tij, që e shoqëronin kur pushtoi fushën.
Zëvendësministri grek i Kulturës dhe Sportit, Yorgos Vassiliadis, ka dalë në një konferencë për shtyp shumë i alarmuar dhe ka thënë se vendi ka bërë shumë hapa mbrapa me këtë situatë dhe se do të komunikojë me UEFA-n për të marrë një vendim shumë të vështirë, që mund të jetë për ndërprerjen e kampionatin.
“Ajo që pamë është një sulm ndaj futbollit grek. Dëmton klubin dhe tifozët e kësaj skuadre. Kur dikush zbret në fushë me pistoletë në brez bën një provokim të papranueshëm,” – deklaroi Ministri i Brendshëm i Greqisë, Panos Skurletis.
Qeveria e Ciprasit ka vendosur ta ndërpresë kampionatin e futbollit, pas incidentit që bëri xhiron e botës me presidentin e PAOK-ut, Ivan Savidis, i cili hyri në fushë me pistoletë.
Dje presidenti i PAOK-ut, Ivan Savidis, zbriti në fushë me pistoletë në brez, pas anulimit të një goli për pozicion jashtë loje në dëm të skuadrës së tij kundër AEK-ut. Rezultati ishte 0-0 në atë moment.
Oligarku rus, 58 vjeç, me origjinë greke, u fut në fushë në minutën e 89-të, i shoqëruar nga truprojat e tij, të cilët kërcënuan arbitrin Georgios Kaminis. Ndeshja u ndërpre direkt dhe Savidi është i kërkuar nga policia, bashkë me persona të tjerë.
