Situata në qytetin e Vlorës ka degraduar në sherr me grushte dhe presione verbale pak minuta para nisjes së numërimit të votave.
Burime për Tirana Today, pohojnë se shkak i këtij konflikti banal ka qenë vonesa e 3 kutive të votimit të fshatit Novoselë në Vlorë nga ana e PS-së.
Kjo ngjarje ka ndodhur në KZAZ nr. 81 ku eksponenti i LSI goditi me grushte komisionerin e PS.
Po ashtu, edhe sipas kandidatit për deputet Shezai Rrokaj, nga radhët e LSI-së është kërkuar verifikimi i tre kutive, për shkak se makina që i transportonte ndryshoi destinacion.
Ndërkohë, bëhet me dije se makina me kutitë e votimit dhe anëtares së komisionit të PS që i ra të fikët u nis për në spital, por eksponenti i LSI-së, saktësisht Moisi Meminaj nuk pranoi që të zbriste pa u dërguar kutitë në KZAZ.
Makina ka devijuar rrugën nga spitali për në KZAZ për të dorëzuar kutitë, por sërish Meminaj dhe kandidati për deputet Flamur Çela kanë kërkuar një ekspertizë të kutive.
Më pas, komisionerët e PS kanë kërkuar që kutitë të dorëzohen dhe më pas të shikohet nëse është në rregull apo jo, por Meminaj i revoltuar ka qëlluar me grusht komisionerin e PS.
Më pas ka ndërhyrë policia për të qetësuar situatën, ndërsa kutitë ende nuk janë dorëzuar në KZAZ.
Moisi Meminaj ka qenë kryetar i PD, por kaloi nga LSI pas përplasjeve me kreun e PD-së, Lulzim Bashën.
