Një grabitje spektakolare ka ndodhur sot në Itali, ndërsa grabitësit me mjaft mjeshtëri kishin gjetur një vend se si të futeshin në një bankë. Italia po përballet me shifra të frikshme të të prekurve si pasojë e pandemisë, masave të shtuara të izolimit e po kështu edhe një situate ku duket se qytetarët janë të pasigurtë.
Persona të armatosur kanë grabitur nën kërcënimin e armëve, një bankë në Milano të Italisë. Ngjarja ndodhi mëngjesin e sotëm, në Piazza Ascoli. Mediat italiane raportojnë se grabitësit janë futur përmes një vrime të hapur nga një pallat ngjitur me bankën.
Ata i kanë drejtuar armën punonjësve të bankës, duke i kërcënuar në mënyrë që t’i dorëzonin paratë.
Në grabitje janë përfshirë gjashtë persona, të cilët mundën të merrnin vetëm paratë e kutisë së sigurisë, pasi kasaforta ka një kodë hapje. Por nuk e kanë lënë me kaq. Pasi kanë marrë shumën e parave, ata kanë hedhur tymuese për të krijuar shpërqendrim, dhe më pas janë futur në kanalizimet e ujërave të zeza dhe janë arratisur.
