Ish-kampioni botëror i boksit, Muhamed Ali, nisi të merrej krejt rastësisht më këtë sport të vështirë. Në vitin 1954 i vjedhin biçikletën që sapo ia kishin blerë prindërit, të cilën e kishte lënë në oborrin e shkollës. I tërbuar nga zemërimi gjen një polic, të cilit i kërkon të gjejë autorin.
Oficeri i policisë, Xho Martin, rastisi të ishte një trajner boksi. Ai e pëlqeu karakterin e adoleshentit, dhe e ftoi të stërvitej si boksier në palestrën e tij. Ironikisht, në ndeshjen e tij të parë në ring në tetor 1960, Ali pati përballë pikërisht një polic, të cilin e mundi.
Bota e kujton si një boksier të madh. Por Ali kishte pasion të shkruante poezi, si dhe të këndonte. Në vitin 1963, ai publikoi albumin me titull “Unë jam më i madhi”. Edhe pse ishte një “bishë” në ring, Muhamed Ali kishte shumë frikë nga fluturimi me avion.
Kur udhëtoi në Evropë për Olimpiadën e Romës në vitin 1960, ishte aq i tmerruar sa që këmbënguli të mbante një parashutë me vete. Gjyshi i Ali ishte irlandezi Abe Gradi. Ai emigroi në Kentaki në vitet 1800, ku u martua me ish-skllaven me ngjyrë Odesa Klei. Karriera e shkëlqyer si boksier, i dha një prestigj të madh në mbarë botën.
Ndërsa ndryshimi i emrit dhe konvertimi në besimin Islam, i dha një popullaritet të madh në Lindjen e Mesme. Një ndër fansat e tij, ishte edhe lideri irakian Sadam Husein. Kur pushtoi Kuvajtin më 1990, Husein mori peng mbi 2.000 të huaj, mes tyre 15 amerikanë. Me porosi të qeverisë amerikane, Ali shkoi enkas në Bagdad, dhe pas një takimi 50 minutësh, e bindi Sadamin të lironte 15 amerikanët. Vdiq më 3 qershor 2016, në moshën 74-vjeçare, pasi kishte vuajtur prej vitesh nga sëmundja e Parkinsonit.
TIRANA TODAY
