Gati 10 vjet pas sulmeve të tmerrshme të 11 Shtatorit 2001, SHBA-të morën frymë të lehtësuara. Trupat speciale, Navy Seals, arritën të përmbushin me sukses operacionin e vrasjes së organizatorit të sulmeve, shefit të Al-Kaedës, Osama Bin Laden. Pasi ishte fshehur për vite me rradhë mes Afganistanit dhe Pakistanit, Bin Laden mendonte se ishte i sigurtë në një shtëpi luksoze 1 milion dollarëshe në Abutabad të Pakistanit. Por ai ishte gjurmuar prej disa kohësh nga amerikanët, falë një spiunimi nga një xhihadist i burgosur.
U deshën 8 muaj verifikime, për t’u siguruar se ishte vërtet ai. Një javë para sulmit, Obama mori prova fotografike se Bin Laden ndodhej aty, ndaj autorizoi nisjen e operacionit për asgjësimin e tij. Operacioni ishte aq sekret, saqë iu mbajt fshehur edhe qeverisë pakistaneze, nga frika e një dekonspirimi. Pak përpara mesnatës, 4 helikopterë hapën zjarr mbi vilën luksoze. Operacioni zgjati 40 minuta. Rojet e Bin Ladenit, u kundërpërgjigjën nga tarraca e shtëpisë së rrethuar me mure të larta, dhe një nga 4 helikopterët u rrëzua. Në fund, Bin Ladeni u qëllua në kokë për vdekje, teksa po përpiqej të shmangte kapjen gjallë.
Asnjë nga trupat special amerikane nuk u plagos. Ato e morën me vete trupin e Bin Ladenit. Pas kryerjes së ritualeve islame, u vendos që ai të hidhej në det në një zonë të panjohur.
Thuhet se Arabia Saudite, refuzoi të pranonte trupin e Bin Ladenit, nga frika se varri i tij do të kthehej në pelegrinazh për terroristët. Por as vdekja e tij, nuk i dha fund polemikave. Fotoja e parë e Bin Ladenit të vdekur, nxiti debate se vrasja e tij mund të mos ishte e vërtetë.
Shumë ekspertë, pretenduan se fotoja e sërvirur e kufomës, ishte një montazh fare i thjeshtë. Lindën pyetjet: Pse CIA apo FBI-ja, nuk e publikuan foton e vërtetë të trupit të Bin Ladenit?
