Lëkundjet e vazhdueshme që u ndjenë ditën e sotme shkaktuan panik tek qytetarët e Tiranës dhe jo vetëm. Të tilla situata të bëjnë të vlerësosh rëndësinë e jetës dhe në të njëjtën kohë, të shikosh se sa i gatshëm është shteti të përballojë këto gjendje të papritura.
Por, tërmeti solli edhe dëme në ndërtesa të ndryshme të kryeqytetit. Pati thyerje xhamash, dëmtime të çative në shumë banesa.
Në një kohë kur ndërtesa të reja vazhdojnë çdo ditë e më tepër të ndërtohen në Tiranë, sa të sigurta janë qytetarët?! Ata thonë për Tirana Today se ndjehen të frikësuar, pasi përgjithësisht pallatet nuk janë ndërtuar me siguri të lartë.
“Mua më duket çdo gjë e pa sigurt këtu në Tiranë. Kisha frikë dhe për një moment thash se u palosëm të gjithë,” shprehet një qytetar.
Një zonjë tregon se këto lëkundje janë shumë të frikshme. Dy djem raportuan se ndërtesat e reja janë jashtë standardeve dhe në ndërtimin e tyre nuk kanë marrë fare në konsideratë rënien e tërmeteve.
