Kryebashkiakja e qytetit Vinto në Bolivi, Patricia Arce, është sulmuar nga disa protestues të cilët e kanë tërhequr zvarrë nëpër rrugë.
Ngjarja është regjistruar ditën e mërkurë, ku një turmë e inatosur i preu flokët dhe e mbuloi me bojë të kuqe.
Sipas mediave vendase, kryebashkiakja u mor nga ndërtesa e bashkisë dhe u rrethua nga njerëz të maskuar që mbanin shkopinj dhe gurë në duar.
Ndërkohë BBC raporton se Patricia Arce akuzohet se ka mbështetur presidentin Evo Morales, në shpërndarjen e një demonstratë anti-qeveritare, gjatë së cilës përflitet se dy protestues mbetën të vdekur.
Nën thirrjet “vrasëse, vrasëse”, disa pjesëtarë të turmës e hodhën përtokë kryebashkiaken dhe i prenë flokët. Më pas ka ardhur edhe ndërhyrja e policisë, e cila e ka marrë kryebashkiaken dhe e ka dërguar në spital.
“Nëse duan të më vrasin, le të më vrasin. Nuk kam frikë. Jetoj në një vend të lirë”, tha një nga organizatorët e lëvizjes për gazetarët.
Ky sulm ishte përleshja më e fundit, pas zgjedhjeve të diskutueshme që u zhvilluan muajin e kaluar.
Pas votimeve më 20 tetor, Morales, një anëtar i partisë MAS i cili ka qenë në pushtet që nga viti 2006, e shpalli veten president.
Por rivali i tij, Carlos Mesa, i quajti zgjedhjet “një mashtrim monumental” dhe pretendon se ato ishin të manipuluara.
Mbështetësit e Mesës që atëherë kanë dalë në rrugë dhe janë përleshur me policinë./ Përshtati: Tirana Today
