Dalin pamjet e para nga ngjarja e rëndë të ndodhur ditën e sotme në qytetin e Vlorës, ku u ekzekutua në një atentat 40-vjeçari, Bledar Birçaj. Nga pamjet e publikuara nga emisioni “Opinion”, shihet se automjeti i viktimës ka qenë duke kaluar në zonën e Lungomares, kur i është prerë rruga.
Dy autorët, të veshur me të zeza, kanë dalë nga makina e tyre, duke qëlluar me breshëri drejt makinës së viktimës, duke e lënë të vdekur në vend.
Pasi autorët janë tërhequr, personi i cili shoqëronte 40-vjeçarin ka dalë nga automjeti dhe është larguar nga vendngjarja.
Por kush është viktima?
Bledar Birçaj është një emër jo i panjohur për policinë e Vlorës, pasi në 21 dhjetor 2010, ai së bashku me vëllanë e tij, Elton Birçaj, kanë dhunuar barbarisht ish-juristin e hipotekës së Vlorës me inicialet F.H.
Për këtë ngjarje, dy vëllezërit janë proceduar në gjëndje të lirë. Shkak i kësaj ngjarje është bërë, problemet që ata kanë pasur me dokumentacionin në një pronë që ndodhet në qytetin e Vlorës.
Birçaj është arrestuar dhe në 27 janar 2011 nga policia dhe prokuroria e Vlorës pasi dyshohej për kryerjen e veprës penale të “Vrasjes me paramendim” e kryer në bashkëpunim mbetur në tentativë; “prodhimit dhe mbajtjes pa leje të armëve luftarake dhe municioneve”; si dhe “Shkatërrim prone”, për tu liruar më pas në prill të 2011-ës.
Mësohet se Birçaj kishte vetëm një muaj që ishte kthyer nga Spanja, dhe një nga pistat ku po hetohet janë konfliktet që mund të ketë pasur në vendin iberik.
