Dëshmia tronditëse që dha pak ditë më parë Miss Universe Kosova, Tuti Sejdiu, tronditi mbarë opinionin publik. Mediat rozë dhe jo vetëm trajtuan historinë e saj, teksa bukuroshja tregonte se ishte përdhunuar e trafikuar në Serbi nga fqinji i saj. Gjithçka ka ndodhur kur ajo ka qenë 13 vjeç. Në një intervistë të fundit për “Prive”, bukuroshja Tuti Sejdiu ka zbuluar se trafikimi është bërë nga një fqinji i saj që e ka marrë në Kosovë, për ta trafikuar në Serbi. Miss Universe Kosova ka treguar se në ditën e tetë pas rrëmbimit e ka shpëtuar Interpoli, dhe më tej e dërgoi në Kosovë.
“Komshiu im më dhunoi dhe më trafikoi nga Kosova në Serbi. Në atë kohë unë isha fëmijë 13 vjeç, dhe nuk e kuptoja gjithçka dhe gjuhën serbe nuk e di e nuk e kam ditur as atëherë. Në ato momente e kam kuptuar se diçka nuk ishte në rregull. Mirëpo ditën e tetë, kur shkova në Serbi më shpëtoi Interpoli dhe më solli në Kosovë pranë familjes time. Unë atë kapitull e kam mbyllur, nuk merrem me të shkuarën, po luftoj vetëm për t’u vendosur drejtësi.
Kur më mori Interpoli, më çoi në një qendër rehabilitimi dhe pastaj erdhi familja më mori. Po për t’i kaluar ato ditë dhe ato vite, më është dashur të bëjë shumë sakrifica për t’i tejkaluar këto sfida. Por sfidat të bëjnë shumë të fortë”, ka rrëfyer Sejdiu.
Në këtë histori është edhe ana tjetër e medaljes, ku shumë njerëz e akuzuan se tregoi ngjarjen për viktimizim.
“E tregova historinë e jetës për dy arsye: babain tim që ka kërkuar drejtësi dhe t’ju tregoj gjithë femrave se ne nuk duhet të heshtim, por ta mbajmë kokën lart dhe të flasim”.
