Presidenti Ilir Meta ka rikujtuar rikthimin në atdhe të familjes mbretërore, pas 63 vitesh mërgimi të detyruar.
Kreu i shtetit ka publikuar në Facebook një video të momentit kur familja mbretërore zbret nga avioni në tokën shqiptare.
Meta e cilëson këtë ngjarje si historike për shqiptarët, duke theksuar se ishte një akt pajtimi dhe rivlerësimi për kontributin e pamohueshëm të Mbretit Ahmet Zogu për krijimin e shtetit shqiptar.
Postimi i plotë:
Rikthimi i Familjes Mbretërore shqiptare në Atdhe 18 vite më parë, pas mbi 6 dekada mërgimi të detyruar është një ngjarje historike për të gjithë shqiptarët.
Edhe pse me vonesë ishte një akt pajtimi dhe rivlerësimi për kontributin e pamohueshem të Mbretit të shqiptarëve, Ahmet Zogut për krijimin dhe funksionimin e shtetit shqiptar modern.
Aq më tepër kur këtë vit festuam 100-vjetorin e Kongresit të Lushnjes ku roli i Tij ka qenë madhor, jo vetëm per realizimin e tij por edhe zbatimin e vendimeve të këtij Kongresi.
Në këtë ditë të shënuar një mirënjohje e veçantë i takon Mbretëreshës Geraldinë e cila në një moshë shumë të re vendosi të bëhej shqiptare dhe i qëndroi besnike përgjithmonë Atdheut që zgjodhi edhe kur ai i ktheu shpinën.
Ajo mbetet një shembull i sakrificës, i vetëmohimit, i dashurisë njerëzore dhe familjare, i faljes dhe tolerancës, por mbi të gjitha i besnikërisë pa kushte ndaj Atdheut. ??
