Dy ditë më parë, në një deklaratë për mediat, Kreu i Shtetit doli kundër të gjithëve. “Nuk ndryshoj mendimin si politikanët që luftojnë për vota”, tha ai. Ai sot ka ftuar median dhe qytetarët për ta ndjekur në një tjetër dalje të tij, ku siç paralajmëron, do të përgjigjet për gjithçka. Përpos kësaj ai nënvizon se do të nisë një betejë të re, për të mbrojtur një të drejtë tjetër kushtetuese të qytetarëve shqiptarë, përveç të drejtës për zgjedhje.
“Të dashur miq,
Ju ftoj të më ndiqni sot live në Syri TV në ora 21:00, në një intervistë për gazetarin e mirënjohur Çim Peka.
Lexova një shënim të Çimit, se do të më bëjë të gjitha pyetjet e mundshme, disa prej të cilave, siç paralajmëron ai, do të jenë pikante.
Unë jam gati të përgjigjem për gjithçka, por edhe unë do të kem disa pyetje për Çimin. Sot nga studio e Syri TV nisim një betejë të re për të mbrojtur një të drejtë tjetër kushtetuese të qytetarëve shqiptarë, përveç të drejtës për zgjedhje”.
Më herët, në një ‘përballje’ me gazetarët, tha se ai nuk ka frikë nga shkarkimi. Presidenti është shprehur se nuk ka frikë, duke hedhur dhe “thumba” për Bashën e Ramën, duke thënë se ata kanë frikë nga zgjedhje të lira.
Më tej Meta deklaroi se ai nuk do të dalë nga zyra para datës 22 korrik 2022, datë që është dhe dita e fundit e mandatit 5-vjeçar.
“Unë disa gjëra i kam thënë shumë qartë, unë nuk jam nga ata që kanë frikë, si ata që kanë frikë nga zgjedhjet e lira. Nuk ka shans që Ilir Meta të dalë para 22 korrikut 2022 nga ky institucion”, tha Meta.
