Vjedhjet në autobusat e linjës, tashmë janë kthyer në modë. Ndonëse shumë denoncime raportohen në polici për vjedhje celularësh, në të shumtën e rasteve ato mbeten pa autor. Por ky rast është përjashtimor, pasi u mjaftuan vetem disa pamje, që hajduti ti drejtohej Klan-it dhe të dorëzonte aparatin e vjedhur.
Pak ditë më parë emisioni “Stop” transmetoi ankesën e qytetarit Altin Dajlani.
Dajlani tregoi vjedhjen e celularit në linjën e autobusëve Kristal-Babrru. Bëri kallëzim në komisariatin numër 3, por as pas 6 muajsh nuk mori një përgjigje.
Gazetarja: Vendi ku ndodhemi sot është një stacion autobusi i linjës Kristal-Babrru. Në një prej autobusëve të kësaj linje, ka ndodhur një vjedhje telefoni më 1 Shtator 2018.
Altin Dajlani: Në atë moment i drejtohem fatorinos dhe i them; më ka humbur telefoni. Ai thotë që ka kamera në autobus, dhe më thotë që nesër mund ta japim videon. Iu drejtova komisariatit nr. 3 pikërisht sepse ndodhesha në atë zonë, dhe bëra denoncim bashkangjitur me videon, por që prej asaj kohe kanë kaluar 5,5 muaj-6 muaj dhe unë nuk kam marrë asnjë përgjigje.
Pas transmetimit në “Stop”, personi që e kishte marrë, e dorëzoi objektin pranë redaksisë dhe celulari shkoi sërish në dorën e të zotit Altin Dajlani.
Gazetarja: Telefoni juaj është dorëzuar në redaksinë e emisionit “Stop”.
Altin Dajlani: Ju falenderoj për punën që keni bërë. Atë që nuk bëri Policia e Shtetit për 6 muaj, ju e bëtë për 3 ditë. /tvklan.al
