Përgjimet e publikuara nga gazeta gjermane Bild vazhdojnë të jenë çështja kryesore e debatit politik në Shqipëri. Së fundmi ka ardhur edhe reagimi i protagonistit kryesor të kësaj ngjarjeje, kryetarit të bashkisë Durrës, Vangjush Dakos.
Ai ishte i ftuar në emisionin ‘Opinion’ mbrëmjen e djeshme në të cilin nuk munguan polemikat midis të ftuarve ndaj kryetarit të bashkisë së Durrësit.
Në debat e sipër në lidhje me zgjedhjet e vitit 2017, kryebashkiaku Dako në argumentin e tij kundra deputetëve demokratë bëri një lapsus. Ai u shpreh se këta të fundit po hidhnin baltë ndaj kriminelëve në përpjekje për të mbuluar rezultatin e dobët të tyre në zgjedhjet e atij viti.
“…e dyta, e dyta, janë deputetët e qarkut të Durrësit të cilët patën një rezultat shumë negativ në qarkun e Durrësit , në 2017 dhe hedhin baltë mbi grupet kriminale për arsye të paaftësisë së tyre dhe pazotësisë për t’u organizuar”, shprehet Vangjush Dako.
Kjo gjë nuk i ka shpëtuar ish-deputetit Petrit Vasili, i cili shprehet se ky është fundi i kryeministrit Rama.
“Fundi!! Vangjush Dako kërkon të mos hidhet baltë mbi grupet kriminale. Ua, ua, ua ky është tamam FUNDI…..i Edi Ramës!!Ja çfarë zuzarësh qeverisin vendin. Shiheni dhe do mbeteni pa gojë”, shkruhet në postimin e Petrit Vasilit.
