Dita e djeshme nuk ishte një ditë e zakonshme për kryeqytetin. Kjo pasi banorët e “Astirit” dolën përsëri në protestë, kësaj radhe para Kuvendit. Teksa paralelisht zhvillohej seanca plenare, ku foli edhe Kryeministri Edi Rama mbi çështjen e “Unazës së Re”. Kryeministri u shpreh i vendosur që kush nuk e ka shtëpinë e legalizuar nuk do të dëmshpërblehet, por do të trajtohen me bonus qiraje apo banesa sociale. Kjo gjë duket se revoltoi më shumë protestuesit, të cilët filluan të bëhen më agresiv gjatë protestës.
Si pasojë mbetën të lënduar 16 punonjës policie , mes të cilëve edhe një efektive e “Shqiponjave”, Ina Muka, 24 vjeç, e cila humbi dy gishta nga shpërthimi i një kapsolle që u hodh në drejtim të saj. Por, veç efektive në spital përfunduan dhe disa protestues të cilët u lënduan gjatë akteve të dhunës.
Por, pas përplasjeve, protesta u zhvendos përsëri te “Unaza e Re”, duke bllokuar përsëri rrugën. Ku nuk munguan konfrontime mes banorëve dhe Forcave të Ndërhyrjes së Shpejtë, të cilët kërkonin lirimin e rrugës.
Një situatë e cila edhe pse solli shumë të lënduar, duket se nuk do të përfundojë shumë shpejt. Kjo pasi banorët janë të vendosur në kërkesat e tyre dhe siç konfirmuan për Tirana Today nuk do të tërhiqen pa marr dëmshpërblim.
Çështja e banorëve të “Astirit” duket se ka ndarë edhe qytetarët. Për disa, banorët kanë të drejtë të kërkojnë dëmshpërblim dhe nuk mund të lihen në rrugë. Ndërkohë, të tjerë mendojnë se kërkesat e tyre nuk janë të drejta, pasi nuk i kanë shtëpitë e legalizuara.
“Qeveria është ajo që ka të drejtë, sepse po ndjek atë që dikton ligji. Ju e keni blerë shtëpinë tuaj?! Edhe këta banorët duhet ta legalizonin. Na kanë zaptuar padrejtësisht.”
“Dihet që kanë të drejtë banorët sepse dalin në mes të rrugës. Qeveria ta mendonte më parë këtë gjë e mos t’i lejonte të ndërtonin. Nuk kanë faje banorët për mangësitë e qeverisë.”
“Nuk ishte as policia e as banorët që provokuan. Ishte kryeministri ai që provokoi teksa fliste në Parlament, kur këputi gjithë ato gjëra për banorët. Unë mendoj që kanë të drejtë banorët. Të rrish 20 vite në shtëpi e të heqin sot, është poshtërsi e madhe.”
“Ata që janë me letra kanë të drejtë të kërkojnë dëmshpërblim. Kurse ata që janë pa letra, duhet të shohin rrugën e zgjidhjes sipas vendimit të qeverisë. Por, ama asnjëherë nuk duhet të cenohen policia e shtetit. Bile ata njerëz që lënduan efektivët, duhet të ndëshkohen.”
“Banorët duhet të merrnin leje për të ndërtuar, por edhe shteti duhej t’i orientonte që në fillim. Mirëpo, më shumë gabim janë banorët. Pse nuk bëra dhe unë kështu kur erdha në Tiranë?! Por, unë e dija që duhej të merrja leje gjithandej, pastaj do filloja të ndërtoja.” TIRANA TODAY
